Төв аймаг-Санхүүгийн аудитыг хийж дууслаа.
Төв аймаг дахь Төрийн аудитын газар нь нийт 336 санхүүгийн тайланд аудит хийхээр төлөвлөснөөс Монгол Улсын Ерөнхий аудиторын 2017 оны 07 дугаар сарын 16-ны А/134 дүгээр тушаалын дагуу 33 санхүүгийн тайланд итгэл үзүүлж, 83 санхүүгийн тайланг түүвэрт хамруулан, 220 санхүүгийн тайланд аудит хийж, дүгнэлт гаргалаа.
78 санхүүгийн тайланд аудитыг гэрээгээр Дундманхайдай Аудит ХХК, Шилэн баланс Аудит ХХК, Уваа уул Аудит ХХК-аар хийлгэж, Төв аймаг дахь Төрийн аудитын газрын аудиторууд 142 санхүүгийн тайланд аудит хийлээ.
Аудитаар 220 байгууллагад санал дүгнэлт гаргаснаас 203 байгууллага буюу 92.3 хувьд нь “Зөрчилгүй”, 16 байгууллага буюу 7.3 хувьд “Хязгаарлалттай” санал дүгнэлт, 0.4 хувьд буюу Сэргэлэн сумын Эрүүл мэндийн төвийн санхүүгийн тайланд “Санал дүгнэлт өгөхөөс татгалзсан” санал дүгнэлт өгсөн байна.
Төсвийн ерөнхийлөн захирагчийн 2017 оны санхүүгийн тайланд нэгтгэгдсэн байгууллагуудын санхүүгийн аудитаар 6921.0 сая төгрөгийн материаллаг, 7041.0 сая төгрөгийн материаллаг бус, нийт 13962.0 сая төгрөгийн алдаа, зөрчил илэрсэн байна. Аудитаар 6092.9 сая төгрөгийн алдааг залруулж, 96.9 сая төгрөгийн төлбөрийн акт, 1395.1 сая төгрөгийн албан шаардлага бичигдэж, 6758.0 сая төгрөгийн алдаа зөрчлийг арилгаж, давтан гаргахгүй байх, хариуцлагыг сайжруулах талаар 416 зөвлөмжийг хүргүүлсэн байна.
Санхүүгийн тайлангийн аудитын удирдлагын систем (СТАУС-2) программыг 2017 оны жилийн эцсийн санхүүгийн тайланд аудит хийхэд бүрэн ашиглалаа. Санхүүгийн аудитад уг программыг ашигласнаар тодорхой хэмжээгээр цаг хугацаа хэмнэж, хянан удирдах үйл ажиллагааны арга зүйг стандартын дагуу хэрэгжүүллээ.
