ТӨСВИЙН ЕРӨНХИЙЛӨН ЗАХИРАГЧДЫН 2017 ОНЫ САНХҮҮГИЙН НЭГТГЭСЭН ТАЙЛАН, ТӨСВИЙН ГҮЙЦЭТГЭЛД САНХҮҮГИЙН АУДИТ ХИЙЖ ДУУСЛАА

Үндэсний аудитын газрын Санхүүгийн аудитын газраас Төрийн аудитын тухай хуульд заасан бүрэн эрхийн хүрээнд, Монгол Улсын Ерөнхий аудиторын 2018 оны 1 сарын 05-ны өдрийн А/04 дүгээр тушаалыг үндэслэн  нийт 31 төсвийн ерөнхийлөн захирагчдын 2017 оны санхүүгийн нэгтгэсэн тайлан, төсвийн гүйцэтгэлд санхүүгийн аудит хийж дууслаа.

МУЕА Д.Хүрэлбаатар төсвийн ерөнхийлөн захирагчдад  аудитын тайлан, гэрчилгээг гардуулан өгч, цаашид анхаарч ажиллах зарим асуудлаар зөвлөмж өгч, харилцан санал солилцлоо.

Мөн тэрээр аудит хийхдээ Монгол улсын Нягтлан бодох бүртгэлийн тухай хууль болон олон улсын аудитын стандартын дагуу хийхээс гадна алдаа зөрчил гарахаас өмнө  урьдчилан сэргийлж ажиллах нь зүйтэй гэдгийг онцлоод, дэмжин туслах үйл ажиллагааг түлхүү анхаарч ажиллахаа илэрхийлэв.

Санхүүгийн аудитын газрын захирал Ц.Наранчимэг төсвийн ерөнхийлөн захирагч тус бүрт санхүүгийн тайлангийн аудитын дүнгийн талаар товч танилцуулга хийж, тайланд орсон өөрчлөлт шинэчлэлийн талаар мэдээлэл өгсөн байна.