Дундговь аймаг: “Таныг сонсъё” нээлттэй хаалганы өдөрлөг зохион байгууллаа

Дундговь аймаг дахь Төрийн аудитын газраас төрийн аудитын байгууллагын зорилго, чиг үүргийг иргэдэд үнэн зөвөөр хүргэж ойлгуулах, тэдний санал бодлыг сонсох зорилгоор “Таныг сонсъё” нээлттэй хаалганы өдөрлөг зохион байгууллаа.

Өдөрлөгийн хүрээнд 2017 оны санхүүгийн тайланд хийсэн аудитын дүн, 2018 онд хийх аудитыг танилцуулж, 2019 онд хийх аудитын сэдвийн санал авах, аудитын байгууллагын үйл ажиллагааг үнэлэх, Шилэн дансны тухай хууль, Орон нутгийн хөгжлийн сангийн журмын хэрэгжилттэй холбоотой асуудлуудаар санал асуулга авч дүнг нэгтгэж, цаашид хэрэгжүүлэх ажлын төлөвлөгөөнд тусган ажиллахаар шийдвэрлэв.

Өдөрлөгт аймгийн удирдлагууд, хэлтэс, тасгийн болон агентлагийн дарга нар урилгаар хүрэлцэн ирлээ. Арга хэмжээнд нийт 300 орчим иргэд, хөдөлмөрчид оролцож төрийн аудитын байгууллагын үйл ажиллагаа, чиг үүрэгтэй холбоотой мэдээлэл авч, 10 гаруй иргэн асуулт асуун, санал шүүмжлэл хэлж төрийн аудитын байгууллагын тухай урьд өмнө нь мэдээлэл муутай байснаа илэрхийлж, анх удаа иргэдийн дунд нээлттэй хаалганы өдөрлөг зохион байгуулж буйд талархалтай хандан, цаашид төрийн бүх байгууллагууд иргэдээ сонсож, тайлангаа танилцуулан тэднээс үнэлгээ авч, ажлаа дүгнэж байх саналыг гаргаж байлаа. Тухайлбал:

• Аудитын байгууллага ажлаа оновчтой зөв төлөвлөж байх, шударга байх,
• Аудитын байгууллагын ажилтнууд биеэ сайн бэлтгэж, мэдлэг чадвараа дээшлүүлэх, биеэ зөв авч явж байх,
• Аудитын байгууллага шалгалтынхаа үр дүнг сайн тооцож ажиллах,
• Аудит, АТГ зэрэг байгууллагуудын хийсэн шалгалтыг шүүх, прокурор, цагдаагийн байгууллагаас хэрэгсэхгүй болгож байгаа нь үр дүнгүй баахан зардал гаргаж, тухайн шалгалтын байгууллагуудын нэр хүндийг унагаад өнгөрч байна. Иймд хуулиар аудитын байгууллагын эрх хэмжээг өргөтгөж өгөх шаардлагатай байна.
• Аливаа аудит, шалгалтыг иргэн хүнд чирэгдэл багатай, хөнгөн шуурхай бөгөөд үр дүнтэй, үр өгөөжтэй болгох зэрэг үнэтэй санал, шүүмжлэл гарсныг томъёолон бичив.

Арга хэмжээний үеэр Дундговь аймаг дахь Төрийн аудитын газрын ахлах аудитор Д.Ихбаяр, аудитор Ж.Угтахбаяр болон аудитороор ажиллаж байсан С.Жалбаа нар Сангийн яамны “Жуух бичиг”-ээр шагнагдсаныг гардуулж өглөө.