Дундговь: “Нээлттэй хаалганы өдөрлөг-2” арга хэмжээ зохион байгууллаа:

Дундговь аймаг дахь Төрийн аудитын газраас төрийн аудитын байгууллагын зорилго, чиг үүргийг үнэн зөвөөр хүргэж ойлгуулах, тэдний санал бодлыг сонсох зорилгоор сумдын төсвийн шууд захирагч, санхүүгийн албаны дарга, мэргэжилтэн, нягтлан бодогч нарын 170 орчим албан хаагчдад “Таныг сонсъё” нээлттэй хаалганы өдөрлөг зохион байгууллаа.

Өдөрлөгийн хүрээнд 2017 оны санхүүгийн тайланд хийсэн аудитын дүн, 2018 онд хийх аудитыг танилцуулж, 2019 онд хийх аудитын сэдвийн санал авах, аудитын байгууллагын үйл ажиллагааг үнэлэх, Шилэн дансны тухай хууль, Орон нутгийн хөгжлийн сангийн зааврын хэрэгжилттэй холбоотой асуудлуудаар санал асуулга авч дүнг нэгтгэж, цаашид хэрэгжүүлэх ажлын төлөвлөгөөнд тусган ажиллахаар шийдвэрлэв.

Мөн арга хэмжээний үеэр дараах байгууллагууд аудитаар илэрсэн алдаа, зөрчилтэй холбоотой дор дурдсан мэдээллийг өдөрлөгт оролцогч нарт өглөө.

• Санхүү, төрийн сангийн хэлтсээс 2017 оны санхүүгийн тайлангийн аудитаар илэрсэн алдаа, зөрчил түүнийг арилгах ажлын төлөвлөгөөний талаар,
• Хөрөнгө оруулалт, хөгжлийн бодлого төлөвлөлтийн хэлтсээс 2017 оны улс, орон нутгийн төсвийн хөрөнгө оруулалтын аудитаар илэрсэн зөрчил, дутагдал, цаашид анхаарах асуудлын талаар,
• Санхүүгийн хяналт, аудитын албанаас дотоод аудитаар нийтлэг илэрсэн алдаа, дутагдлыг танилцууллаа.