Хэнтий аймаг – Газар болон орон нутгийн өмч хөрөнгийн дуудлагын худалдааны үйл ажиллагааны үр дүнд хийсэн гүйцэтгэлийн аудитын талаар
Монгол улсын Ерөнхий аудиторын тушаалыг үндэслэн Хэнтий аймаг дахь Төрийн аудитын газрын 2018 онд хийх ажлын төлөвлөгөөний дагуу 2016-2017 оныг хамруулан аймгийн хэмжээнд газар болон орон нутгийн өмч хөрөнгийн дуудлагын худалдааны үйл ажиллагааны үр дүнд гүйцэтгэлийн аудитыг хийлээ.
Гүйцэтгэлийн аудитыг дуудлагын худалдааг нээлттэй, ил тод зохион байгуулсан эсэх, оролцогчдын эрх, үүрэг бүрэн хангагдаж, зохион байгуулагчид эрх үүргээ хэрхэн хэрэгжүүлсэн эсэх, дуудлагын худалдаанаас бодитой үр дүн гарсан эсэх зэрэг зорилтуудын хүрээнд хийж үр дүнгийн талаарх дүгнэлт, зөвлөмжийг аймгийн Засаг дарга болон холбогдох албан тушаалтанд хүргүүлж, аудитын дүнг аймгийн ИТХ-д танилцуулсан.
Аймгийн хэмжээнд 2016-2017 онд нийт 5205.9 га талбай бүхий 195 нэгж талбар газарт дуудлага худалдаа явуулахаар сумын ИТХ тогтоол гаргажээ. Дуудлага худалдааны үр дүнд 2253.7 га талбай бүхий 82 нэгж талбар газар 380.3 сая төгрөгөөр зарагдаж, 27 нэгж талбар газарт дуудлага худалдаа явуулах шийдвэр гаргаагүй, 86 нэгж талбар газар зарагдаагүй үлдсэн байна. Мөн хугацаанд 32 өмч, хөрөнгийг 187.1 сая төгрөгөөр үнэлэн дуудлагаар худалдахаар аймгийн ИТХ тогтоол гаргажээ. Дуудлага худалдааны үр дүнд 27 өмч, хөрөнгийг 107.0 сая төгрөгөөр худалдаж, 5 өмч, хөрөнгийг худалдаагүй байна.
Тухайн хугацаанд дуудлага худалдаанаас орох 451,2 сая төгрөгийг орон нутгийн төсвийн татварын бус орлогод, 6.1 сая төгрөгийг байгууллагын төсөвт төвлөрүүлсэн байна.
Аудитаар дуудлагаар худалдах газар, өмч хөрөнгийн талаарх мэдээлэл олон нийтийн хэвлэл, мэдээллийн хэрэгслэлээр бүрэн нийтлэгдээгүй мэдээлэл ил тод биш, дуудлага худалдаа бүрт оролцогчийн бүртгэл, явцын тэмдэглэлийг хагас дутуу, хангалтгүй хөтөлдөг, дуудлага худалдааны дэнчингийн төлбөрийг журмын дагуу дансанд төвлөрүүлдэггүй, архивын материалыг хангалтгүй бүрдүүлдэг, дуудлага худалдааны үр дүн, тайланг аймгийн ИТХ-аар хэлэлцүүлээгүй зэрэг зөрчлийг арилгуулахаар холбогдох байгууллагуудад 10 зөвлөмжийг хүргүүлж ажиллалаа.
