Дундговь: “ТОГТООЛ, ШИЙДВЭРИЙН ЭМХЭТГЭЛ” НОМ ХЭВЛЭЛТЭЭС ГАРЛАА.

Дундговь аймаг дахь Төрийн аудитын газраас төсвийн бүх шатны захирагч нар, санхүү бүртгэлийн ажилтнуудын өдөр тутмын ажилд хэрэглэгдэж байдаг нэн чухал шаардлагатай Улсын Их Хурал, Засгийн газрын тогтоол, салбарын сайдын тушаал, аймгийн иргэдийн Төлөөлөгчдийн Хурлын тогтоол, бусад заавар журмыг эмхэтгэн энэхүү номыг бүтээв.
Аудитын байгууллагаас хуулийн дагуу хийгддэг аудитууд болон жил бүрийн санхүүгийн тайланд хийсэн аудитаар өгсөн акт, албан шаардлага, зөвлөмжийн сүүлийн 4-5 жилийн хэрэгжилтийн дүнгээс харахад дараах дүгнэлт гарч байна.
Аудитын шалгалтаар илэрч байгаа зөрчил дутагдлын 60-70 хувь нь санхүү бүртгэлийн ажилтны хууль, эрх зүйн мэдлэг, чадвар, ажлын дадлага туршлагатай холбоотой, 30-40 хувь нь ажилтнуудын ажлын хариуцлага, сахилга бат, ажилд хандах хандлага, дотоод хяналт шалгалт, санхүүгийн удирдлагатай холбоотой гарсан байна.
Иймд төсвийн сахилга батыг сайжруулах, орлого нэмэгдүүлж, зардлыг бууруулах, төсвийн хөрөнгийг зориулалтын дагуу зарцуулах, арвилан хэмнэлтийн горимд ажиллаж сурах, санхүү, нягтлан бодох бүртгэл, хууль эрх зүйн мэдлэгийг дээшлүүлэх, аливаа алдаа дутагдал гарахаас урьдчилан сэргийлэх, таслан зогсооход тус дэмжлэг үзүүлэх зорилгоор тус номыг бүтээв.