Төрийн аудитын байгууллагын 2010 оны жилийн эцсийн статистик мэдээг нэгтгэж, дүгнэсэн тухай

МУ-ын Ерөнхий аудиторын 51 дүгээр тушаалаар батлагдсан ’’Төрийн аудитын байгууллагын үйл ажиллагаанд дотоод аудит, мониторинг хийх журам’’-ындагуу төрийн аудитын төв байгууллагын нэгж, аймаг, нийслэлийн аудитын газруудын 2010 оны үйл ажиллагааны үр дүнгийн статистик мэдээллийг нэгтгэж, дүн шинжилгээ хийснийг танилцуулж байна.

Орон нутгийн аудитын байгууллагууд статистик мэдээг цаасаар болон электрон шуудангаар тогтоосон хугацаанд бүрэн ирүүлж байгаа боловч харилцан зөрүүтэй, алдаатай тоо мэдээлэл ирүүлэх явдал бүрэн арилахгүй байна. Тухайлбал, Баянхонгор, Говьсүмбэр, Дундговь, Завхан, Сүхбаатар, Төв, Нийслэлийн аудитын газруудаас бусад газрууд 4-49 алдаа, зөрүүтэй мэдээлэл ирүүлснийг хянаж, зохих ёсоор залрууллаа

1. Гүйцэтгэлийн аудит:

Төрийн аудитын төв, орон нутгийн байгууллагын хэмжээгээр 2010 онд гүйцэтгэлийн аудит 481-г хийхээр төлөвлөснөөс 467-г гүйцэтгэсэн буюу төлөвлөгөө 97.1 хувийн биелэлттэй байна.

Түүнчлэн, төлөвлөгөөнд тусгагдаагүй аудит 55-ыг хийсэн нь урьд оныхоос 20-оор олон байгаа бөгөөд оны дүнгээр ТАБ-ын хэмжээнд гүйцэтгэлийн аудит бүгд 522-ыг хийжээ.

Гүйцэтгэлийн аудитаар 2010 онд бүгд 4441 байгууллагын үйл ажиллагааг хамруулсны дотор улс, орон нутгийн төсвийн 2816 байгууллага, төрийн болон орон нутгийн өмчит 117 компани, 49 төсөл, хөтөлбөр, хувийн хэвшлийн 1459 аж ахуйн нэгж байна.

ТАБ-ын хэмжээгээр авч үзэхэд 2010 онд төлөвлөж, гүйцэтгэсэн аудитын тоо өнгөрсөн онтой харьцуулахад 21,5 хувиар буюу 178-аар олон, сүүлийн дөрвөн жилийн дундажтай харьцуулахад 1,9 хувиар өсч, энэ онд аудитад хамрагдсан байгууллага, нэгжийн тоо 29,3 хувиар өссөн нь хамарсан асуудлын цар хүрээ өргөжиж эрх бүхий байгууллагын саналаар хийх аудитын тоо 60-аар, улс, орон нутгийн чанартай нийтлэг асуудлыг хөндсөн асуудалд аудитын сэдвийн 60,0 хувийг чиглүүлж байгаа нь нөлөөлж байна.

Өнгөрсөн онд Баян-Өлгий, Увс, Ховд, Говь-Алтай аймгийн аудитын газрууд 33-92 гүйцэтгэлийн аудит хийсэн нь орон нутгийн аудитын байгууллагуудын дундажтай харьцуулахад 10-69-өөр олон, Говьсүмбэр, Орхон, Дундговь, Өвөрхангай аймгийн аудитын газрууд 8-10 аудит хийсэн нь дунджаас 13-15-аар цөөн байна.

Аудитаар илрүүлсэн зөрчил, дутагдал, аудитын үр өгөөжийн дүн, гүйцэтгэсэн аудитын тоонэмэгдэж байгаа нь гүйцэтгэлийн аудитын үр нөлөө, үр өгөөжийг дээшлүүлэхэд аудитын сэдвийг оновчтой, зөв сонгож байгаа болон аудитын газруудын бүтэц, үйл ажиллагааны зохион байгууллалттай холбоотой байна.

Гүйцэтгэлийн аудитын өмнөх оноос шилжиж ирсэн болон тайлант онд нийт 3271 зөвлөмжийн 79,6 хувь буюу 2641-ийг хэрэгжүүлсний 66,4 хувь нь байгууллага, нэгжийн удирдлагад хандаж өгсөн бөгөөд зөвлөмжийн 31,6 хувь нь дотоод хяналтыг сайжруулах, 22,5 хувь нь үр нөлөөг дээшлүүлэхэд чиглэгджээ.

1. Санхүүгийн тайлангийн аудит:

ТАБ-ын хэмжээнд 2010 онд Төсвийн ерөнхийлөн захирагчдын нэгтгэсэн болон улсын төсвийн байгууллагын орон нутгийн түвшинд нэгтгэсэн, улс, орон нутгийн төсвийн байгууллага, төрийн болон орон нутгийн өмчит хуулийн этгээдийн 3172 санхүүгийн тайланд аудит хийсний 77,2 хувийг нь төрийн аудитын төв, орон нутгийн байгууллага, үлдэх 22,8 хувийг Улаанбаатар хот болон аймгууд дахь хувийн хэвшлийн аудитын компаниудаар гэрээгээр хийлгүүлжээ.

            Санхүүгийн тайлангийн аудитын тоо сүүлийн 3 жилийн дунджаас 9,7 хувиар, үүний дотор төсвийн байгууллага, аж ахуйн нэгжийн санхүүгийн тайлангийн аудитын тоо урьд оны мөн үеийнхээс 560-аар нэмэгдсэн нь аймаг, нийслэлийн аудитын газрууд гэрээгээр хийлгэх аудитыг хэрхэн зохион байгуулах талаар тусгайлсан журам шинээр боловсруулж хүргүүлсэн, орон нутагт байршилтай улсын төсвийн байгууллага, төрийн өмчит хуулийн этгээдийн үйл ажиллагаанд ҮАГ-ын нэрийн өмнөөс аудит хийж байх эрхийг аймаг, нийслэлийн аудитын газруудад олгосон, зарим аудитын газруудын бүтэц өөрчлөгдөж, ажиллагсдын тоо өссөн нь нөлөөлжээ.

            Дархан-Уул, Баян-Өлгий, Хөвсгөл Увс аймгийн аудитын газрууд 60-79 аудитыг гэрээгээр хувийн хэвшлийн аудитын байгууллагаар хийлгэж байгаа нь орон нутгийн дунджаас 34-53-аар өндөр байхад Говь-Алтай, Завхан, Сэлэнгэ аймгийн аудитын газрууд дунджаас 20-25-аар цөөн байна. Мөн Булган, Дундговь, Сүхбаатар, Хэнтий аймгийн аудитын газар сүүлийн 3 жил хувийн хэвшлийн аудитын компианаар аудит хийлгээгүй байна

Гэрээгээр санхүүгийн тайлангийн аудит хийлгэхдээ орон нутгийн төсвийн байгууллага болон орон нутгийн өмчит хуулийн этгээдүүдийг аудитад аль болох бүрэн хамруулах бодлого, зорилгыг тэргүүн ээлжинд тавихын оронд санхүүгийн тайлангийн аудитыг үр дүнтэй, холбогдох журмын дагуу бүрэн, чанартай хийлгэх шаардлагыг эрхэмлэж, орон нутагт үйл ажиллагаа явуулж байгаа хувийн хэвшлийн аудитын байгууллагын чадавхи, хараат бус байдал, мэргэжлийн ур чадварын шаардлага хангаж байгаа эсэхийг нэн тэргүүнд харгалзаж байх нь зүйтэй.

Төрийн аудитын байгууллага санхүүгийн тайлангийн аудитаар нийт 6305,4 тэрбум төгрөгийн зөрчил илрүүлж, илрүүлсэн зөрчлийн 4,5 хувь болох 286,9 тэрбум төгрөгийн зөрчлийг санхүүгийн тайланд залруулж тусгуулж, мөн аудитаар илрүүлсэн алдаа зөрчил үнийн дүнгээр урьд оны мөн үеийнхээс 12,4 хувиар өссөн байна.

Санхүүгийн тайлангийн аудитын явцад зардлын ангилалыг буруу хийх, худалдаж авсан хөрөнгийг зардал болгож бичих, шинээр ашиглалтанд орсон болон хандив тусламжаар авсан үндсэн хөрөнгийг орлогодож санхүүгийн тайланд тусгадаггүй, үндсэн хөрөнгийг зөвшөөрөлгүй бэлтгэх, үнэ төлбөргүй авсан бараа материалыг орлого болгоогүй, төсвийн хөрөнгийг зориулалт бусаар зарцуулсан, өр авлагыг бүртгэлд тусгаагүй, үлдэгдлийг баталгаажуулаагүй, орлого үр дүнгийн болон мөнгөн гүйлгээний тайлангийн уялдаа зөрүүтэй, орлого, зардлыг буруу тооцсон, төсөв хэтэрсэн, үндсэн хөрөнгийн элэгдэл буруу тооцоолох, анхан шатны баримтын бүрдүүлэлт хангалтгүй, нягтлан бодох бүртгэлийг олон улсын стандартын дагуу хөтлөөгүй, санхүүгийн тайланг үнэн зөв илэрхийлээгүй зэрэг алдаа зөрчил нийтлэг байна.

Санхүүгийн тайлангийн аудитаар өгсөн санал дүгнэлтийн 72,9 хувийг зөрчилгүй, 20,6 хувийг хязгаарлалттай, 4,7 хувийг сөрөг санал дүгнэлт эзэлж, харин 1,8 хувьд нь дүгнэлт гаргахаас татгалзжээ. Өнгөрсөн онтой харьцуулахад зөрчилгүй санал дүгнэлтийн тоо 7,7 хувиар өсч, хязгаарлалттай санал дүгнэлтийн тоо 7,2 хувиар, сөрөг санал дүгнэлтийн тоо 0,2 хувиар буурчээ. Энэ нь гүйцэтгэсэн аудитын чанар сайжирч аудитор, шинжээчид шинэчлэгдсэн арга зүйг илүү сайн ойлгон хэрэгжүүлж өгсөн зөвлөмжийг шалгагдагч байгууллагууд тодорхой хүрээнд хэрэгжүүлж үр дүнд хүрч байгаагийн нэг илрэл гэж үзэж болохоор байна.

                       САНХҮҮГИЙН АУДИТЫН САНАЛ, ДҮГНЭЛТ

1. Аудитын үр өгөөж:

Тайлант хугацаанд нийт 2974 санхүүгийн болон санхүүгийн бус үр өгөөжийг бүртгэж, бүртгэсэн санхүүгийн үр өгөөжийн мөнгөн дүнгийн үнэлгээ 115,3 тэрбум төгрөг болжээ.

            Гүйцэтгэлийн болон санхүүгийн тайлангийн аудитаар 115,3 тэрбум төгрөгийн үр өгөөж бүртгэж, 114,4 тэрбум төгрөгийн санхүүгийн үр өгөөжийг тооцоолж 90,6 хувийг нь харилцагч байгууллагаар хүлээн зөвшөөрүүлжээ.

            Төрийн аудитын байгууллага улсын төсвөөс авсан нэг төгрөгийн санхүүжилтийн хариуд 32,32 төгрөгийн үр өгөөжийг харилцагч байгууллагаар хүлээн зөвшөөрүүлсэн нь урьд оныхоос 16,92 төгрөгөөр буюу 2,23 дахин нэмэгджээ.

            2010 онд Аудитын үр өгөөжийг дээшлүүлж, арга зүйгээ боловсронгүй болгох зорилт дэвшүүлж, удирдах ажилны зөвлөгөөн дээр Монгол улсын Ерөнхий аудитор төрийн аудитын байгууллагын 2009 оны 1 төгрөгт ногдох үр өгөөжийн хүрсэн түвшинд ойртуулах, хүргэх, хүрсэн түвшингээс ахиулах зорилт тавин ажиллахыг зөвлөсний дагуу тодорхой ажлыг зохион байгуулснаар үр дүнгийн үзүүлэлтүүд нэмэгджээ.

Тайлант хугацаанд бий болгосон үр өгөөжийг өнгөрсөн оны дундаж түвшин болох 14,5 төгрөгтэй харьцуулбал Говьсүмбэр, Ховд, Баян-Өлгий, Дархан-Уул, Төв, Өмнөговь, Нийслэлийн аудитын газруудынх 2,67-55,32 төгрөгөөр дээгүүр байхад харин салбарын дунджаас дээгүүр үзүүлэлттэй байсан Орхон, Дорноговь, Увс аймгийн аудитын газруудын үр өгөөж 2010 онд 6,03-10,49 төгрөг болон буурчээ.

ҮАГ-ын тухайд 2009 онд улсын төсвөөс нийт 509,8 сая төгрөгийн санхүүжилт авч зарцуулж байсан бөгөөд аудитаар 7669.4 сая төгрөгийн үр өгөөж тооцоолж, тэдгээрийг холбогдох байгууллагаар бүрэн хүлээн зөвшөөрүүлсэн дүнтэй гарч байсан бол энэ онд 846,6 сая төгрөгийн санхүүжилт авч үйл ажиллагаандаа зарцуулсан ба тооцоолсон үр өгөөж 50600,9 сая төгрөг, үүнээс хүлээн зөвшөөрүүлсэн нь 50600,9 сая төгрөг болж зөвшөөрүүлсэн үр өгөөж 5,5 дахин нэмэгджээ. Энэ нь ҮАГ 2010 онд улсын төсвөөс авсан санхүүжилтийн 1 төгрөгийн хариуд 59,77 төгрөгийн үр өгөөж бий болгосон нь өмнөх оныхоос 3,9 дахин өсжээ.

Аудитын байгууллага бүр тодорхой хэмжээнд үр өгөөжийг төлөвлөж, бодитойгоор хэрэгжүүлж, бүртгэсэн, бий болсон үр өгөөжийг тооцоолж, холбогдох үр өгөөж хүртэгч талаар хүлээн зөвшөөрүүлсэн мэдээлэл ирүүлж байгаа боловч цаашид түүнийг зөвхөн хэлбэрийн хувьд бус, агуулгын хувьд ч илүү чанаржуулах шаардлагатай нь харагдаж байна. Тухайлбал: Үндсэн хөрөнгийн үнэлгээ хийгээгүй, санхүүгийн тайлангийн зөрүүгээр, тайланд хийсэн залруулгын дүнгээр, байгууллагын жилийн эцсийн тооллого хийгээгүй дүн, улсын төсвийн хөрөнгө оруулалтаар баригдаж байгаа дууссан болон дуусаагүй хөрөнгийг данс бүртгэлд тусгаагүй, байгууллагуудын харилцах дансны үлдэгдлийг төсөвт татсан дүнг үр өгөөжид тооцож үр өгөөжийн тайлбар, тодруулгыг ойлгомжтой бичээгүй алдаанууд байна.  

1. Аудитын зөвлөмж:

Тайлант онд гүйцэтгэлийн болон санхүүгийн тайлангийн аудитаар 8594 аудитын зөвлөмж өгөгдсөн ба өмнөх оноос шилжиж ирсэн 1132 зөвлөмжийг оруулаад нийт зөвлөмжийн 83,3% буюу 8099-ийг хэрэгжүүлээд байна. Үлдэх 16,7% буюу 1627 нь хэрэгжих шатандаа байгаа, хугацаа болоогүй, хугацаа хэтэрсэн боловч хэрэгжээгүй шалтгаанаар 2011 онд шилжихэд Хэнтий, Нийслэл, Дорноговь, Говь-Алтай аймгийн аудитын газруудад 111-235 зөвлөмж дараа онд шилжиж байгаа нь нөлөөлжээ.

            Тайлант хугацаанд хэрэгжүүлсэн зөвлөмжийн 37,5 хувь нь дотоод хяналтыг сайжруулах, 15,5 хувь нь үр ашгийг дээшлүүлэх, 11,0 хувь нь арвилан хэмнэх, 18,3 хувь нь үр нөлөөг сайжруулахад чиглэгджээ.

ТӨРИЙН АУДИТЫН БАЙГУУЛЛАГЫН 2010 ОНД ХЭРЭГЖҮҮЛСЭН ЗӨВЛӨМЖ /хувь/

            Гүйцэтгэлийн болон санхүүгийн тайлангийн аудитад хамрагдсан байгууллагын 66,0-95,4 хувийг улс, орон нутгийн төсвийн байгууллага, төрийн болон орон нутгийн өмчит аж ахуйн нэгж эзэлж байгаа нь дээрхи байгууллагуудад төсөв, хөрөнгийн зарцуулалт, хадгалалт, хамгаалалт, бүртгэл хөтлөлтөд тавих дотоод хяналт хангалтгүй, холбогдох хууль тогтоомжийг мөрдөж ажиллахгүй байгааг харуулж байна.

1. Акт, албан шаардлага:

Төрийн аудитын байгууллагын хэмжээнд нийтдээ 2980 акт, албан шаардлагаар 2434,1 тэрбум төгрөгийн төлбөр ногдуулсан байх бөгөөд энэ нь сүүлийн гурван жилийн дундажтай харьцуулахад тоогоор 58,3 хувиар, үнийн дүнгээр 18,9 дахин өссөн нь Төрийн аудитын байгууллагын хэмжээнд дэвшүүлсэн зорилтын хүрээнд зохион байгуулж, авч хэрэгжүүлсэн ажил тодорхой үр дүнд хүрснийг харуулж байна.

Төрийн аудитын байгууллага тайланд онд 32,6 тэрбум төгрөгийн 2201 төлбөрийн акт (30,5 тэрбум төгрөгийн 1843 төлбөрийн актыг шинээр тогтоосон ба өмнөх оноос 2,1 тэрбум төгрөгийн 358 төлбөрийн акт шилжиж ирсэн) барагдуулах ёстойгоос 76,1 хувь буюу 24,8 тэрбум төгрөгийн 1834 актыг бүрэн барагдуулж, үлдэх 7,8 тэрбум төгрөгийн 367 төлбөрийн акт дараа онд шилжиж байна.

Үүнд: Завхан, Нийслэл, Орхон аймгийн аудитын газар, ҮАГ-ын Гүйцэтгэлийн болон Санхүүгийн аудитын газар 79,2-5925,2 сая төгрөгийн актыг хугацаа болоогүй, хэрэгжих шатандаа, хугацаа хэтэрсэн шалтгаанаар дараа онд шилжүүлсэн нь нөлөөлжээ.

Тайлант хугацаанд 2403,5 тэрбум төгрөгийн зөрчил, дутагдлыг арилгуулахаар 1137 албан шаардлагыг холбогдох албан тушаалтнуудад хүргүүлж, урьд оноос шилжиж ирсэн 6,8 тэрбум төгрөгийн албан шаардлага нэмэгдээд нийт 383,3 тэрбум төгрөгийн зөрчил, дутагдалтай холбогдох 1140 албан шаардлагыг барагдуулжээ.

Улс, орон нутгийн төсөвт төлбөрийн акт, албан шаардлагаар 18,3 тэрбум төгрөг төвлөрүүлсэн нь урьд оныхоос бараг 2,5 дахин буюу 10,9 тэрбум төгрөгөөр нэмэгджээ.

Баянхонгор, Говь-Алтай, Дархан-Уул, Ховд аймгийн аудитын газар нийт төлбөрийн актыг, Баян-Өлгий, Говьсүмбэр, Сүхбаатар, Сэлэнгэ, Увс, Ховд, Хөвсгөл аймгийн аудитын газрууд албан шаардлагыг бүрэн барагдуулжээ.

1. Төсвийн төсөлд боловсруулсан санал:

Төрийн аудитын байгууллага улс, орон нутгийн төсвийн төсөлд 44,8 тэрбум төгрөгөөр орлого нэмэгдүүлэх 108 санал, 8,9 тэрбум төгрөгөөр үр ашиг дээшлүүлэх, зардал хорогдуулах 55 санал боловсруулсан байх бөгөөд тэдгээрээс орлого нэмэгдүүлэх саналын 85,0 хувь, үр ашиг дээшлүүлэх, зардал хорогдуулах саналын 9,6 хувь нь дэмжигдэж холбогдох төсөвт тусгагджээ.

Засгийн газраас УИХ-д өргөн мэдүүлсэн 2011 оны төсвийн төсөлд ҮАГ судалгаа хийж, төсвийн орлогыг 32,8 тэрбум төгрөгөөр нэмэгдүүлэх, зардлыг 7,1 тэрбум төгрөгөөр бууруулах санал оруулснаас 31,2 тэрбум төгрөгийн орлого нэмэгдүүлэх саналыг УИХ хүлээн авч Монгол Улсын 2011 оны төсөвт тусган баталсан бөгөөд ҮАГ энэ саналыг бэлтгэхийн тулд орлого нэмэгдүүлэх зарим боломж, тухайлбал импортын барааны гаалийн татвар, төрийн өмчит хуулийн этгээдийн ногдол ашгийн орлого, газрын тосны бүтээгдэхүүний олборлолт, борлуулалтын орлогын тооцоог хийж тусгайлан судалжээ.  

Аймаг, нийслэлийн аудитын газрууд орон нутгийн төсвийн төсөлд бүгд 11,9 тэрбум төгрөгөөр орлого нэмэгдүүлэх 103 санал, бүгд 1,9 тэрбум төгрөгөөр зардал хорогдуулах 53 санал боловсруулж холбогдох хурлын байгууллагад өргөн барьсан бөгөөд боловсруулсан саналаас 6,8 тэрбум төгрөгөөр орлого нэмэгдүүлэх 78 санал, 0,9 тэрбум төгрөгөөр зардал хорогдуулах 39 саналыг бүрэн хэрэгжүүлжээ.  

Баянхонгор, Говьсүмбэр, Дархан-Уул, Дундговь, Орхон, Сэлэнгэ, Ховд, Хөвсгөл аймгийн аудитын газруудын төсвийн төсөл болон төсвийн хөрөнгийн үр ашгийг нэмэгдүүлэх чиглэлээр өгсөн орлого нэмэгдүүлэх санал, Баян-Өлгий, Дорнод, Дундговь, Сэлэнгэ, Хөвсгөл аймгийн газруудын зардал хорогдуулах санал бүрэн дэмжигджээ.

1. Аудитаар илрүүлсэн алдаа, зөрчил:

ТАБ-ын хэмжээгээр 2010 онд гүйцэтгэсэн аудитын тоо нийт дүнгээрээ өмнөх оныхоос 20,2 хувиар өсч илрүүлсэн алдаа, зөрчлийн дүн өмнөх оноос 9,1 хувиар нэмэгдэж, 6403,7 тэрбум төгрөгт хүрчээ.

Өнгөрсөн онд илрүүлсэн алдаа, зөрчлийн 1,1% буюу 72,7 тэрбум төгрөг нь улс, орон нутгийн төсөв бүрдүүлэлттэй, 0,7% буюу 46,7 тэрбум нь нь өмч хөрөнгийн зарцуулалттай, 63,9% буюу 4090,8 тэрбум төгрөг нь бүртгэл, тайлагналтай холбоотой алдаа зөрчил эзэлж байгаагаас үзэхэд гүйцэтгэлийн болон санхүүгийн тайлангийн аудитад хамрагдсан байгууллага, аж ахуйн нэгжүүдийн төсвийн хөрөнгийн ашиглалт, зарцуулалт, нягтлан бодох бүртгэл хөтлөлт хангалтгүй, санхүүгийн ажилтнуудын мэргэжлийн болон хууль эрх зүйн мэдлэг, ур чадвар, сахилга хариуцлага хангалтгүйг илтгэж байна.

2010 онд илрүүлсэн алдаа зөрчил / тэрбум.төг/

Ялангуяа бүртгэл тайлагналтай холбоотой болон бусад алдаа зөрчил 95,5 хувийг эзэлж аудитаар илрүүлсэн алдаа зөрчил арилахгүй, буурахгүй, дахин давтагдан гараад байгаад аудитын газрууд дүгнэлт хийж аудитаар өгч байгаа зөвлөмж хэр оновчтой, тодорхой, ач холбогдолтой, үр нөлөөтэй байна гэдэгт анхаарлаа хандуулж дутагдал гаргасан ажил хариуцсан ажилтнуудад хариуцлага тооцуулах нь зүйтэй байна.

Аудитаар албан тушаалтанд хариуцлага тооцуулах 657 саналыг холбогдох байгууллага, албан тушаалтанд өгснөөс 90.6 хувь нь бүрэн хэрэгжиж, 5,5 хувь нь хугацаа болоогүй, 3,9 хувь нь хэрэгжээгүй байна. Өмнөх онд шийдвэрлэгдээгүй 43 асуудал нэмэгдээд нийтдээ 126 асуудлыг хууль хяналтын байгууллагад шилжүүлсний 49 нь буюу 38,9 хувь нь хяналтын шатандаа, 60 нь буюу 47,6 хувь нь бүрэн хэрэгжиж, 17 нь буюу 13,5 хувийг хэрэгсэхгүй болгожээ.

1. Аудитын бус үйл ажиллагаа

Төрийн аудитын байгууллагын үйл ажиллагааны талаар радио, телевиз, хэвлэл мэдээллийн хэрэгслээр 600 удаа мэдээлэл, сурталчилгаа хийж, ярилцлага өгсний гадна 1874 сонирхогч хувь хүн, байгууллагад аудитын тайлангийн талаар мэдээлэл гаргаж өгсөн нь урьд оныхоос 47,9 хувиар буюу 801-ээр нэмэгдсэн нь төв, орон нутгийн аудитын байгууллагуудын хэмжээнд гүйцэтгэсэн аудит, хийсэн ажил, үйл ажиллагааны үр дүнгээ мэдээллийн хэрэгслийг ашиглан сурталчлах ажлаа амжилттай зохион байгуулж байгааг харуулж байна.

Төрийн аудитын үйл ажиллагаатай холбоотой 196 мэдээлэл, хүсэлт хүлээн авсны 189 буюу 96,4%-ийг хугацаанд нь шийдвэрлэсэн ба үлдэх 3,6% нь шийдвэрлэх шатанд, хугацаа болоогүй байна. Ирүүлсэн хүсэлт, мэдээллийн 6,6% нь төрийн аудитын байгууллагын үйл ажиллагаатай холбоотой, 3,1% нь ажилтнуудын ур чадвар, ёс зүйг, 19,9% нь аудит хийх эрсдэлтэй асуудлыг, үлдэх нь 70,4 хувь нь бусад сэдвийг хөнджээ.

Төрийн аудитын байгууллага батлагдсан орон тоог бүрэн ашиглаж байгаа бөгөөд нийт ажиллагсдын 82,0 хувь орон нутгийн аудитын байгууллагад ногдож, аймаг, нийслэлийн нэг аудитын газарт дунджаар 10 хүн ажиллажээ.

Нийт ажиллагсдын тоо сүүлийн гурван жилийн дунджаас 9,0 хувиар, өнгөрсөн оныхоос 8,2 хувиар өсжээ.

Ажиллагсдын 18,3 хувь ахлах аудитор, шинжээчид, 24,8 хувь нь аудиторууд, 28,4 хувь нь шинжээчид ажиллаж байгаа бөгөөд урьд оныхоос ахлах аудитор, шинжээчдийн тоо 4,3 функтээр, аудиторуудын тоо 0,3 функтээр тус тус өсжээ.

            Төрийн аудитын байгууллагын мэргэжлийн тасралтгүй сургалтын хөтөлбөрийн хүрээнд төрийн аудитын төв байгууллагын нэгж, аймаг, нийслэлийн аудитын газрууд гадаад болон дотоодын 184 сургалтанд 1775 ажилтнуудыг (давхардсан тоогоор) хамруулан мэргэжил, арга зүйн сургалтыг зохион байгуулсан нь 2009 оныхоос 4,0-5,1 хувиар нэмэгджээ.

Тайлант хугацаанд төрийн аудитын байгууллагын дүнгээр төсвийн гүйцэтгэл 3207,2 сая төгрөг болж, үүний 60,8 хувийг нь цалинд зарцуулж, батлагдсан төсвийг 48,1 сая төгрөгийн хэмнэлттэй зарцуулжээ.

СУДАЛГАА ШИНЖИЛГЭЭНИЙ ГАЗАР

2011 ОНЫ 1 ДҮГЭЭР САРЫН 18