“Монгол Улсын алт олборлох салбарын өнөөгийн байдал, алтны нөөцийн бүрдүүлэлт”-д хийх гүйцэтгэлийн аудитын нээлт боллоо
2018 оны 07 дугаар сарын 30-ны өдөр
УИХ-ын Төсвийн Байнгын хорооны 2017 оны 02 дугаар тогтоол, Монгол Улсын Ерөнхий аудиторын 2018 оны А/06 дугаар тушаалаар баталсан “Төрийн аудитын байгууллагын 2018 оны үйл ажиллагааны ерөнхий төлөвлөгөө”-ний дагуу “Монгол Улсын алт олборлох салбарын өнөөгийн байдал, алтны нөөцийн бүрдүүлэлт”-д хийх гүйцэтгэлийн аудитын нээлт Үндэсний аудитын газрын хурлын танхимд боллоо.
Тус үйл ажиллагаанд Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Гүйцэтгэлийн аудитын газрын аудитын менежер Л.Эрдэнэчулуун, ахлах аудитор, аудиторууд, Уул уурхай, хүнд үйлдвэрийн яамны Уул уурхайн бодлогын газрын дарга Б.Дэлгэржаргал, Геологийн бодлогын газрын дарга Б.Мөнхтөр, Санхүүгийн хэлтсийн дарга М.Аясгалан, Ашигт малтмал, газрын тосны газрын орлогч дарга М.Энхжаргал, Төрийн захиргаа, удирдлагын газрын дарга Б.Дашпүрэв нар оролцлоо.
“Монгол Улсын алт олборлох салбарын өнөөгийн байдал, алтны нөөцийн бүрдүүлэлт”-д гүйцэтгэлийн аудит хийж, дүгнэлт гарган зөвлөмж боловсруулан Улсын Их Хурал болон холбогдох байгууллага, албан тушаалтанд танилцуулж, олон нийтэд мэдээлэхэд аудитын зорилт чиглэгдсэн. Аудитыг дараах дэд зорилтын хүрээнд хэрэгжүүлэх юм. Үүнд:
- Алтны салбарын үйл ажиллагаанд төрөөс баримталж буй бодлого, хууль эрх зүйн орчин зохистой эсэх;
- Алтны нөөц бүрдүүлэлтэд оролцож буй аж ахуйн нэгж, иргэд хуулийн шаардлага, нөхцөлийг ханган ажиллаж байгаа эсэх;
- Алтны салбарын эдийн засагт үзүүлэх үр нөлөөтэй тогтолцоо байгаа эсэх зэрэг асуудлыг хамруулахаар төлөвлөсөн.
Аудитад Монголбанк, Сангийн яам, холбогдох аймгийн Засаг дарга нар, Цагдаагийн ерөнхий газар, Татварын ерөнхий газар, Гаалийн ерөнхий газар, Мэргэжлийн хяналтын ерөнхий газар, Уул уурхай, хүнд үйлдвэрийн яам, Байгаль орчин, аялал жуулчлалын яам, Ашигт малтмал, газрын тосны газар, Стандартчилал, хэмжил зүйн газар, Үнэт металлын сорьцын лаборатори болон алт олборлолтын үйл ажиллагаа явуулж буй зарим тусгай зөвшөөрөл эзэмшигчид болон бусад холбогдох төрийн байгууллагуудыг хамруулна.
