ШИЛЭН ДАНСНЫ ТУХАЙ ХУУЛИЙН ХЭРЭГЖИЛТИЙН ТАЛААР ХЭЛЭЛЦҮҮЛЭГ ЗОХИОН БАЙГУУЛЛАГДЛАА.
Монгол Улсын Ерөнхийлөгчийн Тамгын газар, Үндэсний аудитын газар, Сангийн яам, Нээлттэй нийгэм форум хамтран 2015.05.14-ны өдөр Төрийн ордны Их танхимд “Шилэн дансны тухай хуулийн хэрэгжилт” хэлэлцүүлэг зохион байгууллаа.
Тус хэлэлцүүлэгт Шилэн дансны тухай хуультай холбоотой үйл ажиллагааг гардан зохион байгуулж, хэрэгжилтийг хангадаг мэргэжлийн хүмүүс цуглаж, хуулийн хэрэгжилт ямар байгаа талаар ярилцлаа.
Тус хэлэлцүүлгийг Монгол Улсын Ерөнхийлөгчийн Иргэдийн оролцоо, эдийн засгийн бодлогын зөвлөх Л.Дашдорж нээн үг хэлж, “Шилэн дансны тухай хууль”-ийн нэмэлт, өөрчлөлтийн талаар танилцуулга хийлээ.
Нээлттэй нийгэм форум, эдийн засгийн бодлогын хөтөлбөрийн менежер Д.Оюунбадам “Шилэн дансны тухай хуулийн хэрэгжилтэд хийсэн мониторингийн дүн” сэдвээр
МУИС – Бизнесийн сургуулийн багш доктор, профессор А.Энхбат “Шилэн дансны тухай хуулийн үзэл баримтлал, агуулга, хэрэгжилт” сэдвээр
Сангийн яамны Төрийн сангийн газрын дарга С.Наранцогт Шилэн дансны хуулийн хэрэгжилт болон шилэн дансны нэгдсэн цахим хуудасны систем хөгжүүлэлтийн талаар танилцуулга мэдээлэл хийлээ.
МУ-ын Ерөнхий Аудитор А.Зангад “Шилэн дансны тухай хуулийн 2015 оны эхний улирлын хэрэгжилтэд хийсэн явцын аудитын тайлан”-ийн талаар мэдээлэл хийлээ.
Шилэн дансны тухай хуулийн хэрэгжилт, үр дүнд хийсэн аудитад 5804 байгууллага, аж ахуйн нэгж хамрагдсаны 5399 нь төсвийн байгууллага, 405 нь төрийн болон орон нутгийн өмчийн аж ахуйн нэгж хамрагдсан. Эдгээрийн 96,8 хувь буюу 5617 нь төсвийн ерөнхий мэдээллээ байршуулжээ. Үүнээс 4868 нь нэгдсэн цахим сүлжээ, байгууллагын цахим сүлжээнд, 749 нь мэдээллийн самбарт байршуулсан. 187 нь шилэн дансны мэдээллээ байршуулаагүй байна. 1650 нь байгууллагынхаа мэдээллийн самбарт давхар байршуулжээ.
Аудитад хамрагдсан нийт байгууллагаас 87,9 хувь буюу 4482 байгууллага 5 сая төгрөгөөс дээш үнийн дүн бүхий гүйлгээний мэдээллийг байршуулаагүй, оны эхний улиралд хөрөнгө оруулалт болон бусад томоохон зардлын гүйлгээ гараагүй тохиолдолд хэрхэн тэмдэглэх арга зүй тодорхойгүй байсан гэсэн алдаа дутагдал илэрсэн.
Шилэн дансны нэгдсэн сайтад дутагдалтай талууд байгааг Монгол Улсын Ерөнхий Аудитор дурьдлаа. Уг сайтад санхүүгийн аудитын дүгнэлтийг оруулах цэс байхгүй. Төслүүдэд олгосон санхүүжилт, санхүүжилтийн нөхцөл, эргэн төлөлт зэрэг мэдээллийг байршуулахад нэр болон агуулгын хувьд тохирох цэс байхгүй. Мөн нэгдсэн сайтад мэдээлэл байршуулахад тендэрт шалгарсан болон шалгараагүй байгууллагын нэрийг оруулах боломжгүй, хуульд төсвийн гүйцэтгэлийн хэтрэлт, хэмнэлт, түүний шалтгааны талаарх тайлбарыг улирал тутам оруулж байхаар заасан боловч нэгдсэн цахим хуудсанд зөвхөн хагас, бүтэн жил гэсэн цэс суулгасан.
Мөн цаашид хэрэгжүүлвэл зохих санал санаачлагыг дурьдлаа, Үүнд: цахим хуудсанд мэдээлэл оруулах хугацааны сэрэмжлүүлэг, дохио байвал том давуу тал юм гэж үзэж байгааг илэрхийллээ.
