ШИЛЭН ДАНСНЫ ТУХАЙ ХУУЛИЙН ХЭРЭГЖИЛТЭД ХИЙХ АУДИТЫН НЭЭЛТ БОЛЖ, “НЭЭЛТТЭЙ НИЙГЭМ ФОРУМ”ТББ-ТАЙ ХАМТРАН АЖИЛЛАХ САНАМЖ БИЧИГ СОЛИЛЦЛОО
Төрийн аудитын байгууллага өөрийн чиг үүргийн дагуу 2017-2018 оны Шилэн дансны тухай хуулийн хэрэгжилтэд хийх аудитын нээлт 2018 оны 10 дугаар сарын 10-ны өдөр Үндэсний Аудитын Газрын байранд боллоо. Нээлтэнд хэвлэл мэдээллийн байгууллагын болон төсвийн ерөнхийлөн захирагч нийт 32 байгууллагын төлөөлөл оролцлоо.
Дээрхи аудит нь иргэд, олон нийтийн оролцоог дэмжих зорилгоор “Нээлттэй нийгэм форум” ТББ-ыг хараат бус хөндлөнгийн шинжээчээр оролцуулж, хоёр жилийн хугацаанд хамтран ажиллахаар санамж бичиг солилцсон юм. Тус байгууллагаас судалгаа, дүн шинжилгээ хийж ирүүлсэн дүгнэлт, тайланг Монгол Улсын Ерөнхий аудиторын дэргэдэх “Аудитын иргэний танхим”-аар хэлэлцүүлж, аудитын тайланд нэгтгэнэ.
“Шилэн дансны хуулийн хэрэгжилтэд хийх аудит”-ын ажил нь Төрийн аудитын байгууллага болон иргэд, олон нийт, төрийн бус байгууллагуудын хоорондын хамтын ажиллагааны тогтолцоог бий болгох эхний ажил болж байгаагаараа онцлогтой юм.
Тухайн хамтын ажиллагааны үр дүнд Монгол Улсад төсвийн ил тод, хариуцлагатай байдал сайжирч, Улс төрийн санхүүжилтийн хяналт, ил тод байдал хангагдан, төрийн хяналтыг хэрэгжүүлэх аудитын үйл ажиллагаанд төр, иргэний нийгмийн байгууллагуудын хамтын ажиллагаа нэмэгдэх юм.
Монгол Улсын Төрийн аудитын байгууллага нь Олон Улсын Аудитын дээд байгууллагууд болох ИНТОСАЙ, АСОСАЙ-ийн гишүүний хувьд олон улсад мөрдөгдөж буй стандартад нийцүүлэн тус аудитыг иргэдийн оролцоотой бодит мэдээлэл, баталгаат баримт бичигт тулгуурлан хууль эрх зүйн хүрээнд гүйцэтгэж дүгнэлт гарган, олон нийтийг үнэн зөв мэдээллээр хангах үүргийг зарчим болгон ажиллана.
