ТӨРИЙН АУДИТЫН БАЙГУУЛЛАГЫН БАРУУН БҮСИЙН СУРГАЛТ ЭХЭЛЛЭЭ

Төрийн аудитын байгууллагын “2018 оны сургалтын нэгдсэн төлөвлөгөө”-ний дагуу Дэлхийн банкны буцалтгүй тусламжаар хэрэгжүүлж буй “Үндэсний Аудитын Газрын чадавхийг бэхжүүлэх төсөл”-ийн хүрээнд албан хаагчдын мэргэшил, ур чадварыг дээшлүүлэх Баруун бүсийн сургалт 2018 оны 10 дугаар сарын 10-ны өдөр Говь-Алтай аймгийн Алтай хотноо эхэллээ.

Уг сургалтад Говь-Алтай болон Завхан аймаг дахь Төрийн аудитын газрын нийт албан хаагчид оролцож байгаа бөгөөд сургалтыг ҮАГ-ын Тамгын газрын Хүний нөөцийн албаны менежер Ж.Дэмчигсүрэн нээв.

Тус сургалтаар Санхүүгийн тайлангийн аудитын шинэчилсэн журам, санхүүгийн болон гүйцэтгэлийн аудитын арга зүй, төрийн алба, төрийн болон албаны нууцын тухай, архив албан хэрэг хөтлөлт, төрийн албан хаагчийн ёс зүй, Төрийн аудитын байгууллагын харилцагч талуудын оролцооны стратегийн талаарх сэдвүүдээр 2 өдрийн сургалт явуулж, заавар зөвлөгөөг өгч ажиллана. Мөн сургалтын явцад харилцагч талуудын оролцооны стратегийн бодлогын баримт бичиг боловсруулахад орон нутаг дахь Төрийн аудитын газрын аудиторуудад хэлэлцүүлэг зохион байгуулж тэдний саналыг авах юм.