Хэнтий аймаг – Төрийн аудитын байгууллагын 2018 оны зүүн бүсийн бүсчилсэн сургалтад хамрагдлаа
Төрийн аудитын байгууллагын “2018 оны сургалтын нэгдсэн төлөвлөгөө”-ний дагуу Дэлхийн банкны буцалтгүй тусламжаар хэрэгжүүлж буй “Үндэсний Аудитын Газрын чадавхийг бэхжүүлэх төсөл”-ийн хүрээнд албан хаагчдын мэргэшил, ур чадварыг дээшлүүлэх Зүүн бүсийн сургалт 2018 оны 10 дугаар сарын 8-10-ны өдрүүдэд Дорнод аймагт боллоо. Уг сургалтад Хэнтий, Дорнод, Сүхбаатар аймаг дахь Төрийн Аудитын газрын нийт албан хаагчид оролцож байгаа бөгөөд сургалтыг ҮАГ-ын Стратеги удирдлагын газрын дарга Д.Энхболдоор ахлуулсан ажлын хэсэг зохион байгууллаа.
Тус сургалтаар Санхүүгийн тайлангийн аудитын шинэчилсэн журам, санхүүгийн болон гүйцэтгэлийн аудитын арга зүй, төрийн алба, төрийн болон албаны нууцын тухай, архив албан хэрэг хөтлөлт, төрийн албан хаагчийн ёс зүй, Төрийн аудитын байгууллагын харилцагч талуудын оролцооны стратегийн талаарх сэдвүүдээр 2 өдрийн хичээлийг зааж, амьдрал дээр тохиолддог бодит жишээн дээр ажиллаж санал бодлоо хуваалцаж нэг нэгнээсээ санаа оноо авсан сайхан сургалт боллоо.
Мөн Төрийн аудитын байгууллагад 5, 10 дахь жилдээ ажиллаж буй 15 аудитор мэргэшлийн түвшин тогтоох шалгалтад амжилттай хамрагдлаа.