Төрийн аудитын байгууллагын говийн бүсийн сургалтыг Дундговь аймагт зохион байгууллаа.

Төрийн аудитын байгууллагын мэргэшлийн тасралтгүй сургалтын хөтөлбөрийн хүрээнд бүсийн сургалтыг 2018 оны 10 дугаар сарын 15-ны өдрөөс 10 дугаар сарын 17-ны өдрүүдэд Дундговь аймагт зохион байгууллаа.
Сургалтад Өмнөговь, Төв, Дундговь аймгийн нийт 30 аудитор оролцож, Үндэсний аудитын газрын Стратеги удирдлагын газрын дарга Д.Энхболд, ахлах шинжээч Б.Өлзий болон Тамгын газрын хүний нөөцийн мэргэжилтэн Г.Өлзийдэлгэр, сургалт хариуцсан ажилтан М.Өлзиймягмар, Санхүүгийн аудитын газрын ахлах аудитор Ц.Хосжаргал, Нийслэл дэхь Төрийн аудитын газрын аудитор У.Оюунхүү нар төрийн аудитын байгууллагын албан хаагчдад сургалтын хөтөлбөрийн хүрээнд шаардлагатай мэдээллийг өгч, мэдээлэл солилцов.
Төрийн аудитын байгууллагаас санхүүгийн тайлангийн аудит хийх шинэ журам, санхүүгийн болон гүйцэтгэлийн аудитын арга зүй, аргачлалын өөрчлөлт, шинэчлэлийн талаар сургалт хийж, сэдэв тус бүрээр дадлага ажил зохион байгуулж, дүнг нэгтгэн ярилцаж, Төрийн аудитын байгууллагын харилцагч талуудын оролцооны стратегийн бодлогын баримт бичиг боловсруулахад санал авч, хэлэлцүүлэг явуулсан нь сургалтын онцлог байсан.
Мөн төрийн аудитын байгууллагад 5, 10 дахь жилдээ ажиллаж буй 7 аудитор /Дундговь аймаг дахь Төрийн аудитын газрын аудитын менежер Х.Наранцацрал, ахлах аудитор Ч.Бэрхсайхан, Т.Батсайхан, аудитор Т.Оюун-Эрдэнэ, Төв аймаг дахь Төрийн аудитын газрын ахлах аудитор Т.Майцэцэг, Л.Жаргалсайхан, аудитор Ж.Бямбацогт/ мэргэшлийн түвшин тогтоох шалгалтад амжилттай хамрагдаж, батламж гардан авлаа.
Төв, Өмнөговь, Дундговь аймгуудын төрийн аудитын байгууллагын дотоод үйл ажиллагааг сайжруулахад чиглэсэн зөвлөмж, чиглэлийг газар дээр нь өгч ажилласан нь ихээхэн үр дүнтэй ажил болов.