Төрийн аудитын байгууллагын баруун бүсийн сургалт Хөвсгөл аймгийн Мөрөн хотод зохион байгуулагдлаа.

Төрийн аудитын байгууллагын “2018 оны сургалтын нэгдсэн төлөвлөгөө”-ний дагуу Дэлхийн банкны буцалтгүй тусламжаар хэрэгжүүлж буй “Үндэсний Аудитын Газрын чадавхийг бэхжүүлэх төсөл”-ийн хүрээнд албан хаагчдын мэргэшил, ур чадварыг дээшлүүлэх Баруун бүсийн сургалт Хөвсгөл аймгийн Мөрөн хотод 2018 оны 10 дугаар сарын 19-ний өдрөөс 22-ныг хүртэл амжилттай зохион байгуулагдлаа.

Сургалтад Орхон, Булган, Хөвсгөл аймаг дахь Төрийн аудитын газрын нийт албан хаагчид оролцсон бөгөөд сургалтыг ҮАГ-ын Тамгын газрын Хүний нөөцийн албаны менежер Ж.Дэмчигсүрэн нээв.

“Үндэсний Аудитын Газрын чадавхийг бэхжүүлэх төсөл”-ийн хүрээн дэх албан хаагчдын мэргэшил, ур чадварыг дээшлүүлэх “Баруун бүсийн сургалт”-аар

1.Санхүүгийн тайлангийн аудитын шинэчилсэн журам,
2.Санхүүгийн болон гүйцэтгэлийн аудитын арга зүй,
3.Төрийн алба, төрийн болон албаны нууцын тухай,
4.Архив албан хэрэг хөтлөлт,
5.Төрийн албан хаагчийн ёс зүй,
6. Төрийн аудитын байгууллагын харилцагч талуудын оролцооны стратегийн талаарх сэдвүүдээр сургалт явууллаа.

Мөн сургалтын явцад харилцагч талуудын оролцооны стратегийн бодлогын баримт бичиг боловсруулахад орон нутаг дахь Төрийн аудитын газрын аудиторуудын дунд хэлэлцүүлэг зохион байгуулж саналыг авлаа.

Сургалтын үеэр төрийн аудитын байгууллагад 5, 10 дахь жилдээ ажиллаж буй Орхон, Булган, Хөвсгөл аймгийн Төрийн аудитын газрын 9 аудитор мэргэшлийн түвшин тогтоох шалгалтаа амжилттай өглөө.