ЦЭВЭР АГААР САН БОЛОН 2008-2016 ОНД АГААРЫН БОХИРДЛЫГ БУУРУУЛАХ ЧИГЛЭЛЭЭР ГАДААД, ДОТООДЫН ХӨРӨНГӨӨР ХИЙГДСЭН АЖЛУУДЫН ҮР ДҮНД ХИЙСЭН ГҮЙЦЭТГЭЛИЙН АУДИТЫН ТАЙЛАНГИЙН ТАЛААР МЭДЭЭЛЭЛ ХИЙЛЭЭ
Цэвэр агаарын сан болон 2008-2016 онд агаарын бохирдлыг бууруулах чиглэлээр гадаад, дотоодын хөрөнгөөр хийгдсэн ажлуудын үр дүнд хийх аудитыг Төрийн аудитын тухай хуулиар тодорхойлсон ҮАГ-ын бүрэн эрхийн хүрээнд ГАГ-ын захирал бөгөөд Тэргүүлэх аудитор Л.Одгэрэл удирдан зохион байгуулж, чанарын хяналтыг аудитын менежер Л.Эрдэнэчулуун хэрэгжүүлж, аудитын ажлыг ахлах аудитор Д.Гандолгор, аудитор Б.Булган, Э.Уянга, М.Гүнжмаа, Б.Лхагвацэрэн нар 2018 оны 6 дугаар сарын 30-ны өдрөөс 2018 оны 8 дугаар сарын 30-ны өдрүүдэд хийж гүйцэтгэв.
Цэвэр агаарын сан болон 2008-2016 онд агаарын бохирдлыг бууруулах чиглэлээр гадаад, дотоодын хөрөнгөөр хийгдсэн ажлуудын үр дүнд хийсэн аудитаар илэрсэн зөрчлийн дийлэнх нь агаарын бохирдлыг бууруулах үйл ажиллагааны эрх зүйн зохицуулалт, чиг үүргийн зохион байгуулалт уялдаа холбоогүй, энэ чиглэлийн үйл ажиллагааг хэрэгжүүлэгч, хяналт тавих байгууллагуудыг нэгдмэл удирдлагаар хангаагүй, хэрэгжилтэд тавих хяналт хангалтгүй, үр дүнг нэгтгэн дүгнээгүй, хөндлөнгийн байгууллагаас хийсэн хяналт шалгалтын мөрөөр тодорхой арга хэмжээ авч ажиллаагүй зэрэгтэй холбоотой байна.
Аудитын дүн, дүгнэлттэй уялдаж ЕС буюу Орчны бохирдлыг бууруулах үндэсний хорооны дарга, БОАЖС, СС-д зөвлөмж өгсөн бөгөөд НЗД бөгөөд УБ хотын захирагчид Агаар, орчны бохирдол өсөж байгааг “царцаах болон бууруулах” чиглэлээр хэрэгжүүлэх ажлыг 2 үе шаттайгаар нэгдсэн бодлого, хяналтын дор зохион байгуулах талаар зөвлөмж өглөө.
Мөн УБ хотод агаар, ус, хөрсний бохирдол холбогдох стандарт хэмжээнээс хэтэрч гамшгийн түвшинд хүрсэн, тоос шороо, хог хаягдал, автомашины түгжрэл, дуу чимээ зөвшөөрөгдөх хэмжээнээс хэтрэх эрсдэл үүсэж, хүн амын төвлөрөл нэмэгдэж байгаа нь МУ-ын Үндсэн хуулийн 16 дугаар зүйлийн 2-т заасан МУ-ын иргэний эрүүл аюулгүй орчинд амьдрах эрх ноцтойгоор зөрчигдөж байгаа тул онцгой анхаарал хандуулах шаардлагатай байгааг УИХ-ын анхааралд толилууллаа.
Аудитаар гаргасан зөрчилтэй холбоотой зарим албан тушаалтанд хариуцлага тооцуулахаар Ерөнхий сайд болон Сангийн сайд, Нийслэлийн Засаг дарга бөгөөд Улаанбаатар хотын захирагч нарт зөвлөмж, албан шаардлага өгсөн ба зарим аж ахуйн нэгж, байгууллагатай холбоотой асуудлыг шалгуулахаар хууль хяналтын байгууллагад шилжүүлээд байна.