МОНГОЛ УЛСЫН ЕРӨНХИЙ АУДИТОР Д.ХҮРЭЛБААТАР ГЭРЭЭГЭЭР ХАМТРАН АЖИЛЛАХ ХАРААТ БУС АУДИТЫН КОМПАНИУДЫН УДИРДЛАГУУДТАЙ УУЛЗАЛТ ХИЙЛЭЭ
Үндэсний аудитын газар нь Төрийн аудитын тухай хуулийн 18.5-д “Төрийн аудитын байгууллага санхүүгийн тайланд аудит хийх чиг үүргээ аудитын бусад байгууллагаар гэрээний үндсэн дээр гүйцэтгүүлж болно гэж заасны дагуу 56 аудитын компанитай гэрээ байгуулан 105 төсвийн шууд захирагч, 108 төрийн өмчийн оролцоотой хуулийн этгээдийн 2017 оны санхүүгийн тайлангийн аудитыг гүйцэтгүүлсэн. Мөн дээрх хуульд нийцүүлэн 2017 онд ”Санхүүгийн тайланд аудит хийх хараат бус аудитын хуулийн этгээдийг сонгон шалгаруулах, гэрээ байгуулах, дүгнэх, гүйцэтгэсэн ажлын чанарыг хянах журам” боловсруулан Хууль зүй, дотоод хэргийн яамаар хянуулж Захиргааны ерөнхий хуулийн дагуу захиргааны хэм хэмжээний актын улсын нэгдсэн бүртгэлийн 3806 дугаарт бүртгүүлж, мөрдүүлэн ажиллаж байна.
Энэ журмын дагуу гэрээгээр хамтран ажилласан 56 аудитын компанийн ажлыг үнэлж дүгнэсэн бөгөөд хэрэгжүүлсэн аудитын чанарын хяналтын үнэлгээгээр “хангалттай” үнэлгээ авсан 30 компанийн ажлыг үргэлжлүүлэхээр шийдвэрлэсэн бөгөөд хамгийн өндөр оноо авсан Улаанбаатар корпораци аудит ХХК, Нийслэл аудит ХХК, Сүлд аудит ХХК гэсэн нэр бүхий гурван аудитын компанид Монгол Улсын Ерөнхий аудитор Д.Хүрэлбаатар “Өргөмжлөл” гардуулж баяр хүргэлээ.
Гэрээгээр аудит хийсэн аудитын компаниуд нийт 65.9 тэрбум төгрөгийн алдаа зөрчил илрүүлж 0.4 тэрбум төгрөгийн акт тогтоож, 65.5 тэрбум төгрөгийн албан шаардлага өгч, алдаа зөрчлийг арилгах, цаашид давтан гаргахгүй байх 682 зөвлөмжийг өгч ажилласан байна.
Монгол Улсын Ерөнхий аудитор Төрийн аудитын байгууллагаас цаашид хэрэгжүүлэх бодлого, чиглэлийн талаар танилцуулж санал солилцлоо.
Уулзалтын явцад Санхүүгийн аудитын газрын захирал бөгөөд тэргүүлэх аудитор Ц.Наранчимэг ”Хараат бус аудитын компаниудтай хамтран ажиллахад гарч буй ололт, амжилт, алдаа дутагдал, цаашид анхаарах асуудал”-ын талаар илтгэл тавилаа. Мөн Авлигатай тэмцэх газрын Хяналт шалгалт, дүн шинжилгээний албаны дарга, ахлах комиссар Н.Сүх-Очир “Ашиг сонирхлын зөрчлийн тухай”, Сангийн яамны Нягтлан бодох бүртгэлийн бодлогын газрын дарга Ч.Чимэдсүрэн “Нягтлан бодох бүртгэлийн бодлого чиглэл, Аудитын чанарын тогтолцоо, стандартын өөрчлөлт” сэдвүүдээр мэдээлэл хийсэн юм.
