БНСУ-ын Сөүл хотноо болсон “Нээлттэй засгийн түншлэлийн Ази-Номхон далайн бүс нутгийн хурал”-д Монгол Улсын Ерөнхий аудиторын зөвлөх док. Проф. А.Энхбат илтгэл тавилаа

Бүгд Найрамдах Солонгос Улсын Сөүл хотноо 2018 оны 11 дүгээр сарын 5-6-ны өдрүүдэд  болсон “Нээлттэй засгийн түншлэлийн Ази-Номхон далайн бүс нутгийн хурал”-д Монгол Улсын Ерөнхий аудиторын зөвлөх, док. проф. А.Энхбат, Нийслэлийн Төрийн аудитын газрын Тамгын хэлтсийн дарга Цагаанхүү нар оролцлоо.

Монгол Улсын Ерөнхий аудиторын зөвлөх, док. проф. А.Энхбат  “Иргэдийн оролцоо ба практик: Итгэлийг сайжруулах болон сайн үйлчилгээг чиглүүлэх” хэлэлцүүлэгт Монгол Улсын Төрийн аудитын байгууллагын дэргэдэх Аудитын иргэний танхимын үйл ажиллагаа болон хууль эрх зүйн шинэчлэлтийн талаар илтгэл тавьж танилцуулсан юм.

“Нээлттэй засгийн түншлэлийн Ази-Номхон далайн бүс нутгийн хурал”-д бүс нутгийн гишүүн орнуудыг төлөөлөн Засгийн газрын тэргүүнүүд, иргэний нийгмийн байгууллага, олон улсын хөгжлийн түнш байгууллагын төлөөлөл бүхий 500 гаруй хүн оролцож “Нээлттэй засгийн түншлэл”-ийн хүрээнд  иргэний нийгмийн оролцоо, зөвлөлдөх ардчилал, төрийн үйлчилгээний чанар, хүртээмжийг сайжруулах сорилтын хүрээнд харилцан туршлага солилцлоо.

“Нээлттэй засгийн түншлэл” нь иргэд, олон нийтийн оролцоог хангах, хариуцлагыг нэмэгдүүлэх, авилгаас ангид байх, засаглалын үйл ажиллагаанд дэвшилтэт техник, технологийг нэвтрүүлэх замаар төрийн ил тод байдлыг нэмэгдүүлэн засаглалыг бэхжүүлэх зорилгоор байгуулагдсан сайн дурын олон талт байгууллага юм. “Нээлттэй засгийн түншлэл”-ийг Бразил, Индонез, Мексик, Норвеги, Филиппин, Өмнөд Африк, Их Британи, АНУ зэрэг улс санаачлан 2011 онд үүсгэн байгуулсан бөгөөд өнөөдрийн байдлаар нийт 75 орон гишүүнээр элсээд байна.