Дундговь: “Шилэн дансны тухай хуулийн хэрэгжилт”-д хийсэн аудитын дүнг аймаг, сумдын Засаг дарга, ИТХ-ын дарга, аймгийн төв болон сумдын төсвийн байгууллагуудын удирдлага, нягтлан бодогч нарт танилцууллаа.
Монгол Улсын Их Хурлын Төсвийн байнгын хорооны 2017 оны 06 дугаар тогтоол, Монгол Улсын Ерөнхий аудиторын 2018 оны А/125 дугаар тушаалын нэгдүгээр хавсралтаар батлагдсан Үндэсний аудитын газрын 2018 онд гүйцэтгэх аудитын төлөвлөгөө, Дундговь аймаг дахь Төрийн аудитын газрын 2018 оны үйл ажиллагааны төлөвлөгөөг үндэслэн “Шилэн дансны тухай хуулийн хэрэгжилт”-д нийцлийн аудитыг хийж, аудитын тайланг тушаалаар баталгаажуулан Үндэсний аудитын газрын Нийцлийн аудитын газар болон аймгийн Засаг даргад тус тус хүргүүллээ.
Тайлан хүргүүлэх хугацаатай зэрэгцэн аймгийн Засаг дарга, ИТХ-ын дарга, 15 сумын Засаг дарга, ИТХ-ын дарга нар, аймгийн төв болон сумдын төсвийн байгууллагуудын удирдлага, нягтлан бодогч нарын нийт 200-гаад албан хаагчид “Шилэн дансны тухай хуулийн хэрэгжилт”-д хийсэн аудитын дүнг танилцуулсан нь маш үр дүнтэй ажил боллоо.
Энэ үеэр Санхүү, төрийн сангийн хэлтсийн дарга “Шилэн дансны тухай хуулийн хэрэгжилт”-д хийсэн нийцлийн аудит, “2018 оны төсвийн тухай хуулийн хэрэгжилтийн явц”-д хийсэн гүйцэтгэлийн аудитаар өгөгдсөн зөвлөмжийг хэрэгжүүлэх ажлын төлөвлөгөөг танилцуулж, аймгийн ерөнхий санхүүч шилэн дансны цахим хуудасны аль цэст ямар мэдээлэл оруулах талаар сургалт зохион байгууллаа.
Мөн аймгийн Засаг дарга О.Бат-Эрдэнэ “Шилэн дансны тухай хуулийн хэрэгжилт”-д хийсэн нийцлийн аудитаар өгөгдсөн зөвлөмж, албан шаардлагыг хугацаанд нь хэрэгжүүлж ажиллахыг бүх шатны төсөв захирагч, нягтлан бодогч нарт үүрэг болгож, Шилэн дансны тухай хуулийн хэрэгжилттэй холбоотой зөрчлийг давтан гаргавал хариуцлага тооцох талаар анхааруулав.
“Шилэн дансны тухай хуулийн хэрэгжилт”-д хийсэн нийцлийн аудитын танилцуулгыг энд дарж үзнэ үү.
