Төв аймаг – Санхүүгийн аудитын тайлангийн талаар

Төв аймгийн Аудитын газрын санхүүгийн аудитын баг нь Үндэсний аудитын газраас 2014 онд нэвтрүүлж эхэлсэн Санхүүгийн тайлангийн аудитын удирдлагын систем (СТАУС) программыг санхүүгийн тайлангийн аудитад бүрэн ашиглалаа. Санхүүгийн аудитын багийн аудитор, шинжээч нар нь 2015 оны батлагдсан төлөвлөгөөний дагуу орон нутгийн болон тусгай шилжүүлгийн байгууллага, сангуудын санхүүгийн тайлан, төсвийн ерөнхийлөн захирагчийн санхүүгийн нэгтгэсэн тайланд аудит хийж 184 дүгнэлт гаргалаа.

Аудитын дүгнэлт гаргасан байгууллагуудын 80.4 хувьд буюу 148 байгууллагын санхүүгийн тайланд зөрчилгүй санал дүгнэлт, 35 байгууллагад хязгаарлалттай, 1 байгууллагад татгалзсан дүгнэлт гаргасан байна.

Санхүүгийн тайлангийн аудитаар илэрсэн төлбөр зөрчлийг арилгуулахаар байгууллагын удирдлагуудад 614 зөвлөмж өгч, 10512.3 сая төгрөгийн албан шаардлага, 138.9 сая төгрөгийн төлбөрийн акт бичиж дүнг, тэргүүлэх аудиторын дэргэдэх удирдлагын зөвлөлийн хурлаар хэлэлцүүлэн баталгаажууллаа.

ҮАГазрын санхүүгийн аудитын газраас Төсвийн ерөнхийлөн захирагчийн 2014 оны санхүүгийн нэгтгэсэн тайлангийн дүнгийн талаар 2015 оны 05-р сарын 26, 27-ны өдрүүдэд цахим хурал хийхэд санхүүгийн аудитын багийн гишүүд бүрэн оролцлоо.