ТАЙЛБАР МЭДЭЭЛЭЛ

Монгол HD телевиз болон твиттер хуудсаар манай цахим хуудасны шилэн дансны мэдээллийг буруу ойлгож, ташаа мэдээлэл цацагдаж байгаатай холбогдуулан доорх мэдээлэл тайлбарыг хийж байна.

ТАЙЛБАР МЭДЭЭЛЭЛ

Үндэсний аудитын газрын өрөө байрны хэрэгцээ шаардлагыг Засгийн газрын 2002 оны 120 дугаар тогтоолоор баталсан ‘’Төрийн албан хаагчийн албан ажлын унаа, өрөөний талбайн хэмжээ, тавилга, хэрэгслийн нийтлэг жишиг’’- ээр тодорхойлбол 1036 м2 талбай бүхий албан ажлын өрөө хэрэгцээтэй боловч одоогоор 634 м2 талбай бүхий өрөө тасалгаанд үйл ажиллагаа явуулж байна.

Үндэсний аудитын газар нь ажлын байр хүрэлцээгүй бөгөөд байр түрээслэвэл жил бүр 280,0 сая төгрөг зарцуулахаар тооцоо гарсан.

Ингэж жил бүр байрны түрээсийн төлбөр төлөх нь үргүй зардал их гарах учраас одоо байгаа өрөө тасалгааныхаа зай талбайг ашиглан, том ширээнүүдийг багасган, сүүлийн үеийн оффисын жижиг ширээ тавих нь зардал хэмнэнэ гэж үзсэн.

Дээрх асуудлыг шийдэх үүднээс 2015 онд 49.8 сая төгрөгөөр нийт 96 хүний зай талбай бага эзэлдэг ширээ, сандал, тавилга авч тавьснаар нэг өрөөнд 5-6 хүн ажилладаг байсан бол одоо 10-12 хүн ажиллах боломжтой болсон.

Мөн харьяа орон нутгийн аудитын газрууд 1997 онд ашиглалтанд орсон, ширээ сандал хуучирч эвдэрсэн, солих шаардлагатай талаар хүсэлт ирүүлсэн учир Үндэсний аудитын газрын ашиглаж байсан том хэмжээтэй /2003 оны/ ширээ сандлыг орон нутаг руу шилжүүлж, орон нутгийн эд хогшил худалдан авах төсвийг давхар хэмнэсэн.

Дээрх үйл ажиллагааны үр дүнд жил бүр гарах байрны түрээсийн зардал болон харьяа байгууллагуудын тавилга, эд хогшил худалдан авах зардлыг хэмнэж байгаа болно.

                                                                         ТАЙЛБАР МЭДЭЭЛЭЛ

Мөн нийгмийн асуудал шийдсэн талаар доорх мэдээллийг хүргэж байна.

Үндэсний аудитын газрын аудиторууд давхар үйл ажиллагаа явуулахыг хуулиар хориглосон байдаг.

Аудиторууд нь өөрийн цалингаар орон сууцны урьдчилгаа төлөх боломжгүй учир “Төрийн албаны тухай” хууль, “Төрийн аудитын тухай” хуулийн дагуу нийгмийн асуудлыг шийдвэрлэх талаар жил бүрийн төсвийн төсөлд саналаа оруулдаг бөгөөд төсөв батлагдсан тухайн жилд орон сууцны урьдчилгаанд зориулж буцалтгүй тусламжийг олгодог.

2015 оны батлагдсан төсөвт багтаан 10 аудиторт орон сууцны урьдчилгаа төлөхөд нь зориулж буцалтгүй тусламжийг олгосон.

                                             Үндэсний аудитын газрын Хэвлэл мэдээллийн алба