М Э Д Э Г Д Э Л

Иргэнд олгосон хуулийн боломжийг ашиглан шилэн дансны мэдээллийг мушгин гуйвуулж, улс төр хийгчдэд няцаалт өгөх зорилгоор энэ мэдэгдлийг гаргав

Шилэн дансны тухай хуулийг дагаж мөрдөөд бараг бүтэн жил болох гэж байна.

Албан тушаалтнуудын төрийн төсөв, мөнгөн хөрөнгийг захиран зарцуулах шийдвэр, зарцуулалтыг ил тод болгож, олон нийтийн хяналтад оруулах төрийн бодлого уг хуулийн хүрээнд бодитойгоор хэрэгжиж эхэллээ.

Засгийн газар Шилэн дансны тухай хуулийг хэрэгжүүлэх, Төрийн аудитын байгууллага түүний хэрэгжилтэд хөндлөнгийн хяналт тавих ажлаа оны эхнээс эрчимтэй зохион байгуулж байна.

Хуулийг эхнээс нь нэг мөр ойлгож, хэлбэрэлтгүй дагаж мөрдөх, хэрэгжилтийг хангах чиг үүрэгтэй байгууллагууд ажлаа шуурхай, үр дүнтэй гүйцэтгэхэд дэмжлэг үзүүлэх зорилгоор Төрийн аудитын байгууллага уг хуулийн хэрэгжилтийн эхний улирлын байдалд аудит хийж, сайн эхлэл, ололт амжилтууд, засаж залруулах, хариуцлага тооцох зөрчил, дутагдлуудыг илрүүлэн тодорхой дүгнэлтүүд хийж, хуулийн хэрэгжилтийг эрчимжүүлэх чиглэлээр Засгийн газарт тодорхой зөвлөмжүүд өгсөн.

Төсөв захирагч нарт зориулан Шилэн дансны тухай хуулийн хэрэгжилтийн талаар энэ оны 6 дугаар сард Ерөнхийлөгчийн Тамгын газраас санаачлан зохион байгуулсан зөвлөлдөх уулзалт дээр дээрх аудитын дүнгийн талаар дэлгэрэнгүй танилцуулсан бөгөөд аудитын дүгнэлт зөвлөмжийг тусгасан тайланг бүрэн эхээр нь audit.mn сайтад байрлуулж нийтийн хүртээл болгосон.

Засгийн газар аудитын дүгнэлт, зөвлөмжийг анхааралтай авч үзэж, хуулийн хэрэгжилтийг хангах ажлаа эрчимжүүлэхийн зэрэгцээ энэ оны 3 дугаар улиралд Шилэн дансны тухай хуулийн хэрэгжилтийг тусгайлан шалгаж, дүнг 9 дүгээр сард Засгийн газрын хуралдаанаар авч хэлэлцлээ. Шалгалтын дүнгээр тодорхой албан тушаалтнуудад хариуцлага тооцсон байна.

Түүнчлэн төрийн аудитын байгууллага 2016 оны санхүүгийн тайлангийн явцын аудитын хүрээнд энэ оны 4 дүгээр улиралд багтаан Шилэн дансны тухай хуулийн хэрэгжилтийн сүүлчийн хагас жилийн байдалд нийт төсөв захирагч нарыг хамааруулан аудит хийх бэлтгэлийг хангаад ажлаа эхэлж байна.

Төсөв захирагч нарын төсвийн талаар гаргасан шийдвэр юуны өмнө байгууллагын хамт олон, ажилтнууд, сум, хорооны иргэдэд ил болж, тэдний зүгээс ажил хэрэгч санал шүүмжлэл өрнүүлэх замаар төсвийн зарцуулалтад хяналт тавьж эхэлсэн, энд тэндгүй иргэд олон нийтийн хяналтын идэвхи санаачилга өрнөсөн, сайн арга, сайн эхлэлүүд бий болсон тухай олон арван иргэд аудитын явцад Төрийн аудитын байгууллагад мэдээлэл өгч, ажил хэрэгчээр хамтран ажиллаж байна.

Иргэд олон нийтийн хяналт Шилэн дансны тухай хуулийн хэрэгжилтийг шалгасан дүнгээр Засгийн газраас тодорхой албан тушаалтнуудад хариуцлага тооцож эхэлсэнтэй холбогдон сүүлийн үед улам идэвхжиж, цар хүрээгээ тэлэх төлөвтэй болж байна.

Төсөв захирагчид ч хуулийг дагаж мөрдөхөд онцгойлон анхаарч хамт олон, иргэд олон нийтийн хяналтыг мэдэрч, алдаа дутагдлаа засч залруулан дор бүрдээ хариуцлагаа ухамсарлаж байгаа гэдэгт эргэлзэхгүй байна.

Гэтэл сүүлийн үед тодорхой улс төрийн ажилтан иргэнд хуулиар олгосон эрхийг ашиглан иргэн гэдэг нэрийг өмнөө барьж шилэн дансны мэдээллээр хэвлэл мэдээллийн хэрэгслийг ашиглан улс төр хийж байгаа нь нэн харамсалтай.

Хэлсэн үг, хийсэн үйлдэл бүр нь улс төрийн хийрхэл байдгаараа олон нийтэд танигдаж эхэлсэн тэрээр тодорхой төрийн байгууллага, төрийн албан хаагчдыг бай болгон онилж, төсвийн тодорхой гүйлгээг учрыг нь мэдсээр байж мэдээгүй дүр эсгэн мушгин гуйвуулж сүржигнэх нь өөрийнх нь увайгүй араншин болохоос хол явах үр дагавартай том улс төр биш болов уу.

Гэсэн хэдий ч иймэрхүү зүйлд тодорхой тайлбар хийж, няцаахгүй бол жирийн хүмүүст буруу ойлголт өгч, тархи угаах атгаг зорилго нь тодорхой хугацаанд, тодорхой хүрээнд биелэлээ олох эрсдэлтэй болохыг бодолцон иргэд, олон нийтэд зориулж энэхүү мэдэгдлийг гаргаж байна.

Шилэн дансныхаа мэдээллийг улс төржилт, хийрхэл, мушгин гуйвуулалт гэх мэт аливаа халдлагаас хамгаалах хамгийн сайн, найдвартай арга бол гагцхүү Шилэн дансны тухай хуулийн заалт бүрийг ягштал дагаж мөрдөх, хуульд заасан шаардлагуудыг хэлбэрэлтгүй биелүүлэх, өөрөөр хэлбэл, мэдээлэл, шийдвэр, баримтуудаа хуульд заасан шаардлагын дагуу байнга ил тод болгох явдал гэдгийг нийт төсөв захирагч нарт онцгойлон анхааруулж байна.

Шилэн дансны тухай хуулийн хэрэгжилтэд хөндлөнгийн хяналт тавих үүргийг тухайн хуулиар хүлээсний хувьд Төрийн аудитын байгууллага хуулийн хэрэгжилтийг хангах үүрэгтэй байгууллага албан тушаалтнууд үүргээ хэрхэн биелүүлж байгаад болон төсөв, төрийн мөнгөн хөрөнгийг захиран зарцуулах эрх бүхий албан тушаалтнууд хуулийг дагаж мөрдөж байгаад тогтмол бодитой аудит хийж, зөрчил гаргасан буруутанд хуулийн хүрээнд хариуцлага тооцуулах талаар санаачилгатай ажиллах болно.

Үндэсний аудитын газрын Хэвлэл мэдээллийн алба