ҮНДЭСНИЙ АУДИТЫН ГАЗРЫН 2015 ОНЫ АУДИТЫН БОЛОН АЖИЛ, ҮЙЛЧИЛГЭЭНИЙ ТӨЛӨВЛӨГӨӨНИЙ ДАГУУ ХИЙЖ БУЙ САНХҮҮГИЙН АУДИТЫН ЯВЦЫН ТАЛААР
Төрийн аудитын тухай хууль, Төсвийн тухай хууль, “Санхүүгийн тайлангийн аудитын журам”-ын дагуу төрийн аудитын байгууллагаас 2015 оны санхүүгийн тайланд аудит хийх, итгэл үзүүлж тухайн жилийн санхүүгийн тайланд аудит хийхгүй өнжөөх, аудитын түүвэрт хамрагдах байгууллагуудын нэрсийн жагсаалтыг Монгол Улсын Ерөнхий аудиторын тушаалаар баталлаа.
Нийт 6066 төрийн байгууллагын санхүүгийн тайланд аудит хийхээс Үндэсний аудитын газар төсвийн ерөнхийлөн захирагч 28, Засгийн газрын тусгай сан 14, төсвийн төвлөрүүлэн захирагч 20, төсвийн шууд захирагч 56, аймаг, нийслэлийн аудитын газрууд орон нутгийн төсвийн ерөнхийлөн захирагч 22, төсвийн төвлөрүүлэн захирагч 292, төсвийн шууд захирагч 1657, төсөл, хөтөлбөрийн 261 байгууллагын 2015 оны санхүүгийн тайлан, төсвийн гүйцэтгэлд аудит хийж тус тус дүгнэлт гаргаж үлдсэн байгууллагуудын санхүүгийн тайланг багцлан аудит хийх, түүврийн сорил хэрэгжүүлэхээс гадна гэрээгээр аудит хийлгүүлэхээр төлөвлөөд байна.
Батлагдсан хуваарийн дагуу аудитын төлөвлөгөө гарган төсвийн шууд болон төвлөрүүлэн захирагчдын 2015 оны санхүүгийн тайлангийн завсрын аудитыг төрийн аудитын байгууллагын хэмжээнд 2015 оны 10 дугаар сарын 14-нөөс эхлүүлээд байна.
Санхүүгийн аудитын газар нь аудит хийх бэлтгэл ажлын хүрээнд орон нутгийн аудитын байгууллагуудтай онлайн хурлыг зохион байгуулан, аудит хийх байгууллагуудын жагсаалтыг танилцуулж, 2015 оны санхүүгийн тайланд аудит хийхэд баримтлах чиглэл, ёс зүйн дүрэм, завсрын аудитаар хэрэгжүүлэх ажилбаруудын талаар арга зүйн зөвлөмж өглөө.
Санхүүгийн аудитын газрын дотоод сургалтын төлөвлөгөөний дагуу 2014 онд шинэчлэн баталсан Санхүүгийн тайлангийн аудитын журам, СТАУС-ийн талаарх сургалтад тус газрын ажилтнууд хамрагдсан ба орон нутагт сургалтыг зохион байгуулахаар төлөвлөөд байна.
Төрийн аудитын байгууллагын хязгаарлагдмал нөөцөөр түүнээс давсан их ачаалал, цар хүрээг хамарсан аудитыг тогтоосон хугацаанд хийх шаардлагыг илүү үр нөлөөтэй биелүүлэх, санхүүгийн аудитыг улсын хэмжээнд нэгтгэж, удирдан зохион байгуулах зорилгоор хэрэгжүүлж буй Санхүүгийн тайлангийн аудитын удирдлагын систем /СТАУС/-ийг бүрэн нэвтрүүлэх, 2015 оны санхүүгийн тайлангийн аудитыг хэрэгжүүлэхдээ “аудитын чанарыг дээшлүүлэх” зорилт тавин баримтлах чиглэлээ тодорхойлон ажиллаж байна.
