Хэлэлцүүлэг, бага хурал, форумтай долоо хоног болно.

УИХ-ын Тамгын газрын Хэвлэл мэдээлэл, олон нийттэй харилцах хэлтсийн дарга Д.Энхтуяа УИХ-ын үйл ажиллагааны долоо хоногийн тоймын тухай өнөөдөр сэтгүүлчдэд хийсэн ээлжит мэдээлэлдээ энэ долоо хоногт УИХ урьдын адил ихээхэн ачаалалтай ажиллах төлөвтэй байгааг дурдлаа.

Тухайлахад, өнөөдөр хуваарь ёсоор намын бүлгүүдээс гадна Хилийн боомтын тухай, Үнэт цаасны зах зээлийн тухай, УИХ-ын тухай болон УИХ-ын чуулганы хуралдааны дэгийн тухай хуульд нэмэлт, өөрчлөлт оруулах тухай, Хууль сахиулагчийн эрх зүйн байдлын тухай зэрэг хуулийн төслүүдийг хэлэлцүүлэгт бэлтгэх үүрэгтэй 4 ажлын хэсэг хуралдах бол маргааш Эдийн засаг, Төсөв, Аюулгүй байдал, гадаад бодлого, Байгаль орчин, хүнс, хөдөө аж ахуйн 4 байнгын хороо хуралдахын зэрэгцээ Ёс зүйн дэд хорооны хурлаар УИХ-ын зарим гишүүдийн ёс зүйн асуудлаар ирсэн өргөдлийг хэлэлцэхээр төлөвлөжээ.
Тэгвэл лхагва гарагт болох Төрийн байгуулалтын байнгын хорооны хуралдаанаар Ерөнхийлөгчийн сонгуулийн тухай хуулийг хэрэгжүүлэх талаар зарим байгууллагын үйл ажиллагаатай танилцсан дүнг хэлэлцэх бол Хууль зүйн байнгын хорооны хуралдаанаар Монгол Улс дахь хүний эрх, эрх чөлөөний байдлын талаархи Хүний эрхийн үндэсний комиссын 12 дахь илтгэлийг сонсох юм байна.

Харин УИХ-ын чуулганы өнгөрсөн долоо хоногийн нэгдсэн хуралдаанаар хэлэлцэх үеэр намын бүлгүүд завсарлага авсантай холбогдуулан хойшлуулсан Монгол Улсын Ерөнхий сайдыг огцруулах эсэх тухай, УИХ-ын дэд дарга С.Баярцогтыг үүрэгт ажлаас нь чөлөөлөх тухай асуудлыг чуулганы энэ долоо хоногийн нэгдсэн хуралдаанаар үргэлжлүүлэн хэлэлцэж шийдвэрлэнэ. Мөн Засгийн газраас хууль сахиулах байгууллагуудын эрх зүйн зохицуулалтыг шинэтгэх чиглэлээр өргөн мэдүүлээд байгаа багц хуулийн төслүүд болох Цагдаагийн байгууллагын тухай, Маршалын албаны тухай, Гэрч, хохирогчийг хамгаалах тухай, Төлбөрийн чадваргүй яллагдагчид үзүүлэх хууль зүйн туслалцааны тухай хуулийн төслүүдийн хэлэлцэх эсэхийг шийдвэрлэхийн зэрэгцээ хуульд заасны дагуу Монгол Улсын Ерөнхийлөгчийн сонгуулийн өмнөх улс орны эдийн засаг, санхүү, төсвийн төлөв байдлын талаархи Засгийн газрын мэдээллийг сонсох гэдгийг тэрээр хэллээ.
Түүнчлэн энэ долоо хоногт байнгын хороод хэд хэдэн хэлэлцүүлэг, бага хурал зохион байгуулахаар төлөвлөснийг тэрээр дурдав. Тухайлахад, Байгаль орчин, хүнс, хөдөө аж ахуйн байнгын хороо өнөөдөр Мазаалай баавгайг хамгаалах асуудлаар, Нийгмийн бодлого, боловсрол, соёл, шинжлэх ухааны байнгын хороо маргааш Иргэний эрүүл мэндийн даатгалын тухай хуулийн шинэчилсэн найруулгын төслөөр хэлэлцүүлэг хийх бол Аюулгүй байдал, гадаад бодлогын байнгын хороо лхагва гарагт “Геополитикийн шинэ нөхцөл байдал, аюулгүй байдал, гадаад бодлогын зарим асуудал” сэдвээр эрдэм шинжилгээний бага хурал зохион байгуулах юм.
Мөн энэ долоо хоногийн сүүлчээр Улаанбаатар хотноо Ардчилсан орнуудын хамтын нийгэмлэгийн Сайд нарын 7 дугаар бага хурал болно. Бага хурлын хүрээнд болох Парламентын форумд дэлхийн 20-иод орны парламентын төлөөлөгчид оролцох төлөвтэй байгаа, бага хурал, форумын бэлтгэл үндсэндээ хангагдаад байгааг тэрээр мэдээлэлдээ дурдлаа.
Харин УИХ өнгөрсөн долоо хоногт Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид гадаадын хөрөнгө оруулалтыг зохицуулах тухай хуульд өөрчлөлт оруулах тухай хуулийн төслийг баталснаар гадаадын хөрөнгө оруулалтын эрх зүйн орчин сайжирч, улс орны эдийн засгийн амьдралд зохих ахиц гарах боломж бүрдэж байгааг Д.Энхтуяа дарга мэдээлэлдээ онцлов. Сүүлийн үед Монгол оронд орж ирэх гадаадын хөрөнгө оруулалт буурч, төсвийн бүрдэлтэд хүндрэл учирч мэдэхээр байгааг ихээхэн ярих болсон. Үүнтэй холбогдуулан 2012 оны УИХ-ын сонгуулийн өмнөхөн баталсан энэ хуульд өөрчлөлт оруулж, Стратегийн ач холбогдол бүхий салбарт үйл ажиллагаа эрхлэх, эсхүл үйл ажиллагаа явуулж байгаа аж ахуйн нэгжийн гадаадын төрийн өмчит болон төрийн өмчийн оролцоотой хөрөнгө оруулагчийн эзэмших хувь хэмжээ 49 хувиас илүү гарах тохиолдолд Засгийн газрын өргөн мэдүүлснээр Улсын Их Хурал шийдвэрлэх бөгөөд бусад тохиолдолд зөвшөөрөл олгох асуудлыг Засгийн газар шийдвэрлэхээр болсон юм.
Мөн Засгийн газраас хууль сахиулах байгууллагуудын үйл ажиллагаанд эрх зүйн шинэтгэл хийх үүднээс 6 багц хуулийн төсөл санаачлан УИХ-д өргөн барьсан. Үүний нэг нь болох Хууль сахиулагчийн эрх зүйн байдлын тухай хуулийн төслийн хэлэлцэх эсэхийг гишүүд нухацтай ярилцаж төслийг хэлэлцэхийг дэмжсэн. Ер нь Засгийн газар шударга ёсны зарчмыг хэрэгжүүлэх, нийгмийг гэмт халдлагаас хамгаалах шинэтгэлийн хүрээнд 11 хууль батлуулж мөрдүүлэхээр төлөвлөж, эхний таван хуулийн төслийг энэ удаад хэлэлцүүлэхээр оруулж ирээд байгаа. Мөн энэ багц хуулийн төслийн хүрээнд өргөн баригдсан Цагдаагийн байгууллагын тухай хуулийн төслийн хэлэлцэх эсэхийг чуулганы нэгдсэн хуралдаанаар хэлэлцэж эхлээд байгаа. Хууль зүйн шинэтгэлийн нэг цогц арга хэмжээ болох эдгээр хуулийн төслүүдийг энэ хаврын чуулганаар багцаар хэлэлцэж шийдвэрлэхээр УИХ төлөвлөж байгааг тэрээр онцолсон юм.

Эх сурвалж http://www.parliament.mn/