ЭМГЭНЭЛ

ЭМГЭНЭЛ

ЛХАМСҮРЭНГИЙН ЖАВЗМАА

(1945-2015)

 Монгол төрийн нэрт зүтгэлтэн, Монгол Улсын анхны Ерөнхий аудитор Лхамсүрэнгийн Жавзмаа 2015 оны 11 дүгээр сарын 11-ний өдөр хүнд өвчнөөр таалал төгслөө.

Л.Жавзмаа нь 1945 онд Булган аймгийн Дашинчилэн сумын нутагт төрсөн бөгөөд бага насаа эцэг эхийн асрамжинд өнгөрөөн, улмаар ерөнхий боловсролын дунд сургууль, Санхүүгийн техникум, Хөдөө аж ахуйн дээд сургууль, Намын дээд сургуулийг тус тус дүүргэж, санхүүч, эдийн засагч, улс төр судлаачийн мэргэжил эзэмшсэн байна.

1966 онд Булган аймгийн АДХ-ын Гүйцэтгэх захиргааны Санхүүгийн хэлтэст хянан байцаагчаар анх томилогдож, ажил хөдөлмөрийн гараагаа эхэлүүлснээс хойш ахуй үйлчилгээ, төр, захиргаа, төрийн хяналт, төрийн аудитын байгууллага, дипломат албанд 48 жил тасралтгүй ажиллаж байгаад өндөр насны тэтгэвэрт гарсан юм.

1975 онд Булган аймгийн Нийтийн аж ахуй, үйлчилгээний газрын даргаар томилогдсон нь төр, засгийн удирдах ажлыг хийх эхлэл болсон төдийгүй 1983 онд Улаанбаатар хотын Нийтийн аж ахуй, үйлчилгээний газрын даргаар дэвшин ажиллаж, иргэд, олон түмэнд нийтийн болон ахуйн үйлчилгээ үзүүлэх ажлыг үр бүтээлтэй удирдан зохион байгуулж, шилдэг удирдах ажилтан болохоо харуулсан юм.

Л.Жавзмаа 1985-1995 онд нийслэлийн Налайх, Сүхбаатар дүүргийн АДХ-ын Гүйцэтгэх захиргааны дарга, Улаанбаатар хотын АДХ-ын Гүйцэтгэх захиргааны орлогч дарга, Булган аймгийн Засаг даргын албыг хашихдаа иргэдэд бүх төрлийн төрийн үйлчилгээг ойртуулах, сахилга дэг журмыг сайжруулах, нийслэлийн хүн амын ахуйн болон худалдаа, үйлчилгээний нэр төрөл, хэмжээ, цэг салбарын тоог нэмэгдүүлж, өргөн хэрэглээний барааны хангамжийг сайжруулах, орон нутгийн төсвийн орлогын бааз суурийг нэмэгдүүлэх, малчдын ахуй, амьдрал, орлогыг дээшлүүлэх, газар тариаланг өргөжүүлэн хөгжүүлэх ажлыг удирдан зохион байгуулж, өөрийн бодит хувь нэмрийг оруулсан юм.

1995 онд Төрийн хянан шалгах хорооны даргаар томилогдож ажиллахдаа хөндлөнгийн хараат бус төрийн хяналтыг хэрэгжүүлэх байгууллагыг шинээр үүсгэн байгуулж, төрийн хяналтын хууль эрх зүйн орчин, арга зүйг боловсронгуй болгох

төрийн аудитын байгууллагын хараат бус байдлыг бэхжүүлэх, олон улсын хэмжээнд нэр хүндтэй байгууллага болгоход өөрийн оюун ухаан, хүч чадал, мэдлэг боловсролоо дайчлан ажилласан юм.

2003 онд Монгол Улсын анхны Ерөнхий аудитороор томилогдож, Үндэсний аудитын газрыг удирдсан бөгөөд төрийн аудитын орчин үеийн төрөл болох гүйцэтгэлийн болон санхүүгийн аудитын олон улсын стандарт, шилдэг туршлагыг эзэмшүүлэх, аудитын арга зүйг боловсронгуй болгоход манлайлсан төдийгүй төрийн аудитын байгууллагыг мэргэжлийн чадварлаг боловсон хүчнээр хангах, материаллаг баазыг бэхжүүлэхэд ихээхэн анхаарч ажилласан нь зохих үр дүнгээ өгч байна.

2010-2014 онд ОХУ-ын Улаан-Үүд хот дахь Монгол Улсын Ерөнхий консулаар томилогдож дипломат албанд ажиллахдаа дэлхийн Монголчуудын чуулга уулзалтыг зохион байгуулж, Монгол Улс, Орос-Буриад Улсын төр, засгийн тэргүүнийг харилцан айлчлуулж, хоёр орны хамтын ажиллагааг өргөжүүлэхэд зохих хувь нэмэр оруулсан юм.

Мөн Л.Жавзмаа нь хайртай ханийн түшиг тулгуур, үр хүүхэд, ач зээгийн халамжит аав, өвөө, ах дүү, төрөл төрөгсдийн итгэлт зөвлөх, өрх гэр бүлийн хүндэт тэргүүн байлаа.

Тэрбээр төрийн санхүүгийн удирдлагыг боловсронгуй болгох, төсвийн сахилгыг сайжруулах, төсвийн орлогыг нэмэгдүүлэх, зардлыг хямдруулах, төсвийн хөрөнгийн үр ашгийг дээшлүүлэх, төрийн бүтцийг цомхон, чадварлаг болгох талаар зарчимч байр суурийг тууштай баримталдаг, аливаа асуудалд улс, эх орон, иргэд, олон нийтийн эрх ашгийн үүднээс ухаалаг ханддаг төрийн нэрт зүтгэлтэн, шилдэг удирдах ажилтан болохыг төр, иргэд, олон нийт сайн мэддэг юм.

Л.Жавзмаагийн хөдөлмөрийн үр дүнг төр, засаг үнэлж, Хөдөлмөрийн гавьяаны улаан тугийн болон Алтан гадас одон, Хөдөлмөрийн хүндэт медаль, Ардын хувьсгалын түүхт ойн медалиуд, салбаруудын тэргүүний ажилтан, Нийслэл Улаанбаатар хотын дээд шагнал Хангарьд одон, зарим гадаад орны одон, тэмдэг, хүндэт өргөмжлөлөөр шагнасан юм.

Л.Жавзмаагийн эх оронч, зарчимч, халамжит, нөхөрсөг, хүнлэг, ухаалаг зан чанар нь хамт олон бидний зүрх сэтгэлд үүрд хоногшин үлдэх болно.

Ум сайн амгалан болтугай

Үндэсний аудитын газрын болон аймаг, нийслэлийн Аудитын газрын хамт олон, Гадаад хэргийн яамны хамт олон, төрийн аудитын байгууллагын Ахмадын зөвлөл