Аудит хийх тухай мэдээлэл

Үндэсний аудитын газрын Стратеги удирдлагын газраас Монгол Улсын Ерөнхий аудиторын санаачилгаар Төрийн аудитын тухай хуулиар тодорхойлсон Үндэсний аудитын газрын бүрэн эрхийн хүрээнд 2013 оны 08 дугаар сарын

15-наас 11 дүгээр сарын 01-ний хугацаанд “Засгийн газрын яам, агентлагуудын бүтэц, зохион байгуулалтын оновчтой, үр нөлөөтэй байдал”-д аудит хийж эхэллээ.

Аудитын зорилго нь Засгийн газрын яам, агентлагуудын бүтэц, зохион байгуулалттай холбоотой дараахь асуудлыг хамруулан шалгаж, дүгнэлт гарган, үр ашгийг дээшлүүлэх санал, зөвлөмжийг холбогдох байгууллага, албан тушаалтанд танилцуулахад оршино . Үүнд:

•  Засгийн газрын бодлогыг хэрэгжүүлэх яам, агентлаг, байгууллагын бүтэц, чиг үүргийн хуваарилалтыг оновчтой байдлаар хууль тогтоомжид нийцүүлж зохион байгуулсан эсэх.
•    Зарим яам, агентлаг, байгууллагын удирдлага, санхүүжилтийн тогтолцоог боловсронгуй болгох замаар төсвийн хөрөнгө хэмнэх, төрийн үйлчилгээний чанар, хүртээмжийг дээшлүүлэх боломж байгаа эсэх.

Аудитын хамрах хүрээ нь Монгол Улсын бүх яам, хэрэгжүүлэгч болон тохируулагч 28 агентлагуудыг хамруулах бөгөөд удирдлага санхүүжилт, зохион байгуулалтын бүтцийн асуудал, ажил үүргийн хуваарийг тэдний гүйцэтгэсэн ажлын тайлан болон бусад холбогдох материалд тулгуурлан аудитыг гүйцэтгэхээр төлөвлөсөн байна.