Киргиз Улсын Тооцооны танхимын дарга Үндэсний аудитын газарт айлчиллаа.

Киргиз Улсын Тооцооны танхимын дарга тэргүүтэй Киргизийн Тооцооны танхимын төлөөлөгчид 2013 оны 8 дугаар сарын 24-29-ний өдрүүдэд Монгол Улсын Үндэсний аудитын газарт айлчиллаа.

Киргиз Улсын Тооцооны танхимын дарга тэргүүтэй төлөөлөгчдийг Монгол Улсын Ерөнхий аудитор А.Зангад хүлээн авч уулзаж, 2 орны Аудитын дээд байгууллагуудын хоорондын харилцаа, хамтын ажиллагааг бэхжүүлэн хөгжүүлэх талаар санал солилцсон.

Энэхүү айлчлалын зорилго нь Киргиз Улсын Тооцооны танхимын төлөөлөгчид Монгол Улсын Үндэсний аудитын газрын үйл ажиллагаатай танилцаж, Монгол Улсын төрийн аудитын байгууллагын хууль эрх зүйн орчин, хүний нөөц, цаашлаад аудитын үйл ажиллагаа, арга зүй зэрэг асуудлаар туршлага судлах байсан. Тиймээс энэ зорилгын хүрээнд Үндэсний аудитын газрын Удирдлага, Захиргаа, үйлчилгээний газар, Стратегийн Удирдлагын газар, Санхүүгийн, гүйцэтгэлийн болон Нийцлийн аудитын газруудын удирдлага, ажилтнууд төлөөлөгчдөд зориулан 3 өдрийн туршлага солилцох уулзалтуудыг зохион байгууллаа.

Айлчлалын үеэр Киргиз Улсын Тооцооны танхимын дарга Монгол Улсын Ерөнхий аудитор А.Зангадыг Киргиз улсад айлчлахыг албан ёсоор урьсанаас гадна энэхүү айлчлалын үеэр Монгол Улсын Үндэсний аудитын газар болон Киргиз Улсын Тооцооны танхимын хооронд Хамтран ажиллах тухай Харилцан ойлголцлын санамж бичигт  хоёр тал гарын үсэг зурахаар тохиролцлоо.