ГҮЙЦЭТГЭЛИЙН АУДИТЫН ГАЗРЫН АЖЛЫН ЯВЦ, МЭДЭЭЛЭЛ

Төсвийн гүйцэтгэлийн аудитын алба:

1. Монгол Улсын 2016 оны нэгдсэн төсвийн төсөлд Үндэсний аудитын газраас өгсөн санал, дүгнэлтийг хуулиар тогтоосон хугацаанд буюу 2015 оны 10 дугаар сарын 15-нд Улсын Их Хуралд хүргүүлж, уг төсвийн төслийг УИХ-ын Байнгын хороод болон Нэгдсэн чуулганаар хэлэлцэн батлах үйл явцтай холбогдуулан ҮАГ-ын удирдлагуудад нэмэлт судалгаа, мэдээллийг бэлтгэн өгч ажиллалаа.

Дээрх аудитын хүрээнд хийсэн судалгаагаар илэрсэн зөрчлийг арилгуулахаар Сангийн яаманд 2 асуудлаар албан шаардлага бичиж хүргүүлсэн бөгөөд “Нээлттэй нийгэм форум” ТББ-аас зохион байгуулсан төсвийн төслийн хэлэлцүүлэгт тус албаны ахлах аудитор, шинжээч нар оролцсон болно.

2. “Татварын хөнгөлөлт, чөлөөлөлтийн хуулийн хэрэгжилт, үр дүн”-д хийсэн аудитын тайланг дуусгаж Монгол Улсын Ерөнхий аудиторын тушаалаар баталгаажуулан, аудитын тайланг УИХ-ын Төсвийн Байнгын хороо, Засгийн газрын Хэрэг эрхлэх газар, Сангийн яам, Гаалийн ерөнхий газар, Татварын ерөнхий газарт тус тус хүргүүллээ.

Аудитаар:

• Зарим тоног төхөөрөмжийн гаалийн түр горимд байрших хуулийн хугацаа хэтэрч, түүнд ногдох гаалийн болон НӨАТ-ыг нөхөн төлүүлээгүй зөрчлийг илрүүлэн 37,5 сая төгрөгийн акт тогтоож, аудитын хугацаанд нөхөн төлүүлснээс гадна 593.3 сая төгрөгийн зөрчлийг арилгуулах 2 албан шаардлага өгсөн болно.
• Татварын хөнгөлөлт, чөлөөлөлт үзүүлж буй мөнгөн дүн бага бус /татварын орлогын 11.7 хувьд хүрсэн/, татварын хөнгөлөлт, чөлөөлөлт үзүүлэх хуулийн заалтууд хэт олон, хамрах хүрээ өргөн, татварын хөнгөлөлт чөлөөлөлт оновчтой бус, үр дүн багатай байгааг дүгнэж, эдгээрийг засаж залруулах талаар Сангийн сайдад 3, Гаалийн болон Татварын ерөнхий газрын удирдлагад 2 асуудлаар тус тус зөвлөмж өглөө.
• Аудитаар өгсөн зөвлөмж, акт, албан шаардлагыг хэрэгжүүлснээр Гаалийн байгууллагад 18.2 тэрбум, Татварын байгууллагад 18.5 тэрбум төгрөгийн үр өгөөж бий болох тооцоог хийж, харилцагч байгууллагуудаар баталгаажуулсан болно.

Чиглэлийн аудитын алба:

3. “Уул уурхайн нөхөн сэргээлтийн хөрөнгийн төвлөрүүлэлт, зарцуулалт, үр дүн”-д хийж буй аудитаар нийт 20 аймгийн Аудитын газраас аудитын тайланг ирүүлээд байна. Аудитын батлагдсан төлөвлөгөөний дагуу талбарын ажлыг дуусгаж, тайлагнах үйл ажиллагааг эхлүүлэн ажиллаж байна. Мөн аудитын хүрээнд ашиглалтын болон хайгуулын тусгай зөвшөөрөл эзэмшигчдийн судалгааг орон нутгаас хүлээн авч, нэгтгэж байна.

4. ”Хил орчмын байгаль орчныг хамгаалах талаар төрийн зохицуулалтын үр нөлөөт байдал” сэдэвт аудитын батлагдсан төлөвлөгөөний дагуу талбарын ажлыг дуусгаж, аудиторууд хариуцсан асуудлаар тайлан бичиж хянуулсан бөгөөд нэгдсэн тайланг бэлтгэж байна.

5. “Олборлох үйлдвэрлэлийн ил тод байдлын санаачилга” Үндэсний чуулганд Гүйцэтгэлийн аудитын газрын ажилтнууд оролцлоо.

• 2015 оны 11 дүгээр сарын 3-наас 4-ний өдрүүдэд зооохион байгуулагдсан Монголын Олборлох үйлдвэрлэлийн ил тод байдлын санаачилгын Үндэсний чуулганд Чиглэлийн аудитын албаны менежер Д.Баттулга, шинжээч С.Одонцэцэг нар оролцлоо.
• Форумаар Олборлох байдлын талаар тайлагнах үйл явцыг тооноос чанарт шилжүүлэх, Ил тод болсон мэдээллийг ашиглах, ОҮИТБС-ыг орон нутагт хэрэгжүүлэх, Дэд зөвлөлийн тогтвортой үйл ажиллагааг хангах чиглэлээр төрийн байгууллага, ТББ, ААН-ийн төлөөллүүд санал солилцлоо.

Хөрөнгө оруулалтын аудитын алба:

6. “Төрийн өмчит их, дээд сургуулиудын 2013-2015 оны үйл ажиллагаа, үр дүн” сэдэвт аудитын төлөвлөгөө, хуваарийн дагуу аудитор, шинжээчид төрийн өмчит их дээд сургуулиудад талбарын ажлыг гүйцэтгэж байна.

• Аудитын хүрээнд 2015 оны 11 дүгээр сарын 2-ны өдөр орон нутгийн 7 аймгийн аудитын багтай аудитын явцын талаар онлайн ярилцлага, хэлэлцүүлэг хийлээ. Хэлэлцүүлгээр салбар болон бүрэлдэхүүн сургуулиудын аудитын явц, учирч буй хүндрэл, бэрхшээлийн талаар мэдээлэл авч, харилцан санал солилцож, холбогдох арга зүйн зөвлөгөө өглөө.