Дундговь аймгийн аудитын газар аймгийн 2016 оны төсвийн төсөлд санал орууллаа

Дундговь аймгийн аудитын газар Төрийн аудитын тухай хуулийн 15 дугаар зүйлийн 15.2.4-д заасан бүрэн эрхийн хүрээнд аймгийн Засаг даргаас Иргэдийн Төлөөлөгчдийн Хуралд өргөн мэдүүлсэн аймгийн 2016 оны төсвийн төсөлд санал орууллаа.

Сангийн сайдын 2012 оны 244 дугаар тушаалаар баталсан “Орон нутгийн төсвийн төсөл боловсруулах журам”-ын 7.3-д зааснаар аймгийн Засаг дарга Дундговь аймгийн 2016 оны төсвийн төслийг аудитын газарт 11 дүгээр сарын 10-ны дотор хүргүүлэхээр тусгасан боловч улсын төсөв 11 дугаар сарын 13-ны өдөр батлагдсантай холбоотойгоор 2015 оны 11 дүгээр сарын 24-нд ирүүлсэн.

2015 оны хүлээгдэж буй гүйцэтгэлээр тасрах хандлагатай боловч 2016 оны төсвийн төсөлд нэмэгдүүлэн тооцоолсон 1, биелэх боломжтой 2  орлогын талаар санал хүргүүллээ.

1. Хог хаягдлын үйлчилгээний хураамж:

Аймаг сумын ИТХ, Засаг дарга нар Хог хаягдлын тухай хуулинд заасан эрх үүргээ хэрэгжүүлэх талаар шат шатандаа анхаарч, татварыг ногдуулан хурааж авбал дээрх орлого бүрдэх боломжтой бөгөөд өмнөх оны батлагдсан дүнгээс бууруулахгүйгээр төлөвлөх шаардлагатай гэж үзсэн.

2.  Газрын төлбөр:

Орлогын төлөвлөгөө биелэхгүй байгаа нь хуульд заасан газрын төлбөр ногдох зүйлд ногдуулалтыг бүрэн хийдэггүй, ногдуулсан татварыг бүрэн төлөхгүй байгаатай холбоотой байна.Тухайлбал:

• зам, шугам сүлжээний газрын километр тутмын газрын төлбөрийг ногдуулахгүй байна.
• мал бүхий этгээдээс бэлчээрийн зориулалтаар эзэмшиж, ашиглаж байгаа газрын төлбөрийг ногдуулахгүй байна.

3. Газрын дуудлага худалдаа:

Дундговь аймгийн 2015 оны газар зохион байгуулалтын төлөвлөгөөнд нийт 142,097.0 м² газар дуудлага худалдаагаар олгохоор төлөвлөснөөс 20,342.0 м² газар олгож 122,755.0 м² газар олгогдоогүй байна.

Дээрхи олгогдоогүй газруудад дуудлага худалдаа зохион байгуулж анхны үнээр олгоно гэж тооцоход 49.1 сая төгрөг орно гэж үзсэн.

Дундговь аймгийн аудитын газраас хүргүүлсэн саналууд дэмжигдэн Иргэдийн Төлөөлөгчдийн Хурлаар 2016 оны төсөвт газрын дуудлага худалдааны орлогыг  50 сая төгрөгөөр нэмэгдүүлэн баталж, хог хаягдлын үйлчилгээний хураамжаас орох орлогыг сумдын иргэдийн төлөөлөлгчдийн хурлын төсөв батлах хуралд хэлэлцүүлэхээр боллоо.