МОНГОЛ УЛСЫН ЕРӨНХИЙ АУДИТОР А.ЗАНГАД ИХ БРИТАНИ УМАРД ИРЛАНДЫН НЭГДСЭН ВАНТ УЛСЫН ҮНДЭСНИЙ АУДИТЫН ГАЗАРТ АЛБАН ЁСНЫ АЙЛЧЛАЛ ХИЙЛЭЭ

Монгол Улсын Ерөнхий аудитор А.Зангад тэргүүтэй төлөөлөгчид Их Британи Умард Ирландын Нэгдсэн Вант Улсын Үндэсний аудитын газарт 2014 оны 05 дугаар сарын 05-09 өдрүүдэд албан ёсны айлчлал хийлээ. Төлөөлөгчдийн бүрэлдэхүүнд Улсын Их Хурлын гишүүн, Төсвийн Байнгын хорооны дарга Ц.Даваасүрэн, Үндэсний аудитын газрын Ерөнхий менежер Э.Отгон, Нийслэлийн аудитын газрын дарга, тэргүүлэх аудитор Ц.Очирбат, Орхон аймгийн аудитын газрын дарга, тэргүүлэх аудитор Д.Цогбадрах, Баян-Өлгий аймгийн аудитын газрын дарга, тэргүүлэх аудитор Х.Бекен, Үндэсний аудитын газрын гадаад харилцааны мэргэжилтэн, ахлах шинжээч Л.Нүрзэд нар оролцлоо.

Их Британи Умард Ирландын Нэгдсэн Вант Улсын Ерөнхий аудитор Амяас Морсе Монгол Улсын Ерөнхий аудитор А.Зангадыг хүлээн авч хүндэтгэл үзүүлэн, найрсаг харилцаа хамтын ажиллагаагаа өргөжүүлэх хүрээнд үр дүнтэй санал солилцож, нэгдсэн шийдвэрт хүрлээ. Айлчлалын хөтөлбөрийн хүрээнд Нэгдсэн Вант улсын Үндэсний аудитын газрын удирдлагууд байгууллагынхаа үйл ажиллагааны талаар танилцуулга хийж, хоёр өдрийн туршид Санхүүгийн аудит, Гүйцэтгэлийн аудит, Парламенттай харилцах харилцаа, Мэдээллийн технологи, Зохион байгуулалтын бүтцийн талаар мэдээлэл өглөө. Айлчлалын төгсгөлд Монгол Улсын Ерөнхий аудитор Их Британи Умард Ирландын Нэгдсэн Вант Улсын Ерөнхий аудитор Амяас Морсе-ийг Монгол Улсад албан ёсны айлчлал хийхийг урилаа.