Үндэсний аудитын газраас “Алдаа, зөрчлийн талаарх ойлголт, түүнийг шийдвэрлэх нь” сэдэвт хэлэлцүүлгийг танхим болон цахимаар хослуулан зохион байгууллаа. Хэлэлцүүлэгт Төрийн аудитын байгууллагын албан хаагчид, Монгол Улсын Их хурлын Тамгын газар, Монгол Улсын Ерөнхий прокурорын газар, Сангийн яамны Нягтлан бодох бүртгэлийн газар, аудитын хуулийн этгээдийн төлөөллүүд зэрэг нийт 140 гаруй хүн оролцов.
Монгол Улсын Ерөнхий аудиторын орлогч Я.Сарансүх хэлэлцүүлгийг нээж үг хэлэхдээ “Аудитын үр дүн гэж бидний аудитаар илрүүлсэн буруу илэрхийлэл, түүний дотор залилан, өнөөдрийн хэлэлцүүлгийн сэдэв болж байгаа алдаа, зөрчлийг хамруулдаг. Төрийн аудитын эрх зүйн орчны шинэчлэлтэй уялдуулан журам, зааварт томоохон өөрчлөлтийг хийж энэ тайлант оноос эхлэн алдаа, зөрчлийг тусад нь салгаж тайлагнах, чиглэлээр холбогдох арга хэмжээ авахаар төлөвлөн ажиллаж байна” гэдгийг онцолж, алдаа, зөрчлийн талаар нэгдсэн ойлголтод хүрч, түүнийг шийдвэрлэх зөв арга замыг тодорхойлох нь энэхүү хэлэлцүүлгийн гол зорилго хэмээн тодотгов.
Үндэсний аудитын газрын Аудитын нэгдсэн удирдлага, зохицуулалтын газар, Санхүү-нийцлийн аудитын газар, Гүйцэтгэл-нийцлийн аудитын газраас аудитын илрүүлэлт буюу алдаа, зөрчлийн талаар илтгэл танилцууллаа.
Мөн Сангийн яамны Нягтлан бодох бүртгэлийн бодлогын газрын дарга Б.Болормаа “Алдааны талаарх стандартын ойлголт” сэдвээр, Монгол Улсын Ерөнхий прокурорын газрын Зөрчлийн хэрэгт хяналт тавих хэлтсийн хяналтын прокурор Б.Соёлсайхан “Зөрчлийн тухай хууль, анхаарах асуудлууд, “Мандах” Их сургуулийн багш М.Энхсүрэн “Ашгийн удирдлага ба аудитын илрүүлэлт”, Мүүрь аудит ХХК-ийн чанарын хяналтын менежер Н.Гэрэлчимэг “Аудитын явцад илрүүлсэн буруу илэрхийлэл түүнийг үнэлэх нь” сэдвээр тус тус илтгэл тавьсан юм.
Үүний дараа илтгэлүүдийн сэдэвтэй холбогдуулан хэлэлцүүлэг өрнүүлэхэд оролцогчид алдаа, зөрчлийн талаарх нэгдсэн ойлголтод хүрэхүйц үр дүнтэй, цаг үеэ олсон чухал асуудлыг хөндсөн байна хэмээлээ.
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
