Төрийн аудитын байгууллагад Европын холбооны санхүүжилттэй “Монгол Улсад тогтвортой хөгжлийн зорилготой уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих нь” төслийг хэрэгжүүлдэг. Төслийн хүрээнд “Үр дүнд суурилсан төлөвлөлт болон төсөвлөлтийн арга зүй” сургалт-семинарыг 2023 оны 6 дугаар сарын 2-ны өдрөөс эхлүүлэн 9-ний өдрийг хүртэл цахим болон танхим хослуулан зохион байгууллаа. Танхимын сургалт-семинарт Үндэсний аудитын газрын холбогдох албан хаагчид болон аймаг, нийслэл дэх Төрийн аудитын газрын менежерүүд, нягтлан бодогчид хамрагдсан юм.
Энэхүү танхимын сургалт-семинарыг нээж Үндэсний аудитын газрын Тамгын дарга, тэргүүлэх аудитор С.Цэрэнбаяр “Монгол Улсын урт хугацааны хөгжлийн бодлого “Алсын хараа 2050”, “Тогтвортой хөгжлийн зорилт-2030” зэрэг хөгжлийн хөтөлбөрүүдэд төрийн албаны шинэчлэлийг тусгасны хүрээнд үр дүнд суурилсан төлөвлөлт болон төсөвлөлтийн арга зүйг боловсруулсан. Төрийн аудитын байгууллага 2024 оны төсвөө төлөвлөхдөө үр дүнд суурилсан төлөвлөлт болон төсөвлөлтийн арга зүйг ашиглаж байгаа нь урьд өмнөх жилүүдээс онцлогтой байна. Төрийн аудитын байгууллагын хувьд хяналт тавьж ажиллах үүднээс бүх шатны төсөв захирагчдын төсвийн төлөвлөлт, төсвийн гүйцэтгэл, тайлагнал нь үр дүнд суурилсан арга зүйг хэрэгжүүлж чадаж байгаа эсэхэд цаашид аудит хийхэд мөн чухал ач холбогдолтой сургалт-семинар боллоо” хэмээн онцлов.
НҮБ-ын Хөгжлийн хөтөлбөрийн төслийн менежер Б.Нинжин “НҮБ-ын Хөгжлийн хөтөлбөрийн төслийн зүгээс 2024 оны төсвийг үр дүнд чиглэсэн байдлаар боловсруулахад дэмжлэг үзүүлэн ажиллаж байна. 2022 оны 12 дугаар сард үр дүнд суурилсан арга аргачлал боловсруулагдсан. Улсын хөгжлийн жилийн төлөвлөгөөг үр дүнд суурилсан байдлаар боловсруулсан бол одоо байгууллагуудын түвшинд хэрэгжиж эхэлж байгаа нь энэ юм. Төрийн аудитын байгууллага УИХ-ын харьяа бусад байгууллагуудаа манлайлж, түүчээ нь болж ирэх 2024 оны төсвөө үр дүнд суурилсан арга аргачлалаар төлөвлөж байгаа нь онцлогтой байна” гээд сургалтад оролцогчдод амжилт хүссэн юм.
Сургалт-семинарт оролцогчид “Төсөв ерөнхийлөн захирагчийн болон хөтөлбөрийн үр дүнг орон нутгийн түвшинд төсөвлөх нь”, “Хөтөлбөрийн үр дүнг хангахад чиглэсэн үйл ажиллагаа, төсөл, арга хэмжээг төлөвлөх нь” гэсэн үндсэн сэдвийн хүрээнд онолын мэдлэг, арга зүйд суралцаж, Төрийн аудитын байгууллагын 2024 оны төсвийг үр дүнд суурилсан арга, аргачлалаар боловсруулж байна.
Алсын хараа
АЛСЫН ХАРАА Монгол Улсын хөгжлийн бодлого, зорилтуудыг хэрэгжүүлэхэд чиглэсэн эдийн…
