Төрийн аудитын байгууллага нь Монгол Улсын хөгжлийн бодлого, зорилтуудыг хэрэгжүүлэхэд чиглэсэн эдийн засаг, нийгмийн өндөр үр нөлөөтэй төрийн аудитыг гүйцэтгэх эрхэм зорилготой болно.

Төрийн санхүү, төсөв, нийтийн өмчийг хууль ёсны дагуу арвилан хэмнэлттэй, үр ашигтай, үр нөлөөтэйгөөр төлөвлөх, хуваарилах, ашиглах, зарцуулах үйл ажиллагаанд хараат бус хяналтыг хэрэгжүүлж, төрийн санхүүгийн удирдлагыг сайжруулахад Улсын Их Хуралтай харилцах харилцаа нэн чухал үүрэгтэй байдаг.

Төрийн аудитын байгууллага нь Улсын Их Хуралтай дараах үндсэн чиглэлүүдийн дагуу байнгын харилцаа холбоотой ажилладаг. Үүнд:

• УИХ-ын санхүүгийн тайланд аудит хийх, хэрэв УИХ хүсэлт гаргасан тохиолдолд түүний үйл ажиллагаанд бусад төрөл, хэлбэрээр аудит хийх;
• Аудитын байгууллагын удирдлагыг томилуулах;
• Аудитын байгууллагын орон тооны дээд хязгаарыг батлуулах;
• Аудитын байгууллагын үйл ажиллагааны жилийн тайланг танилцуулах;
• Аудитын сэдвийг танилцуулж, шийдвэрлүүлэх;
• Төлөвлөгөөт болон төлөвлөгөөт бус аудитын тайланг хүргүүлэн танилцуулах;
• Төрийн санхүү, төсвийн хяналтыг хэрэгжүүлэхтэй холбоотой асуудлаар санал, зөвлөмж бэлтгэн танилцуулах;
• Улсын нэгдсэн төсвийн гүйцэтгэл, Засгийн газрын өрийн тайлан болон санхүүгийн нэгдсэн тайлан, жилийн төсвийн төсөлд аудит хийн дүгнэлтийг танилцуулах.
• Аудитын байгууллагын үйл ажиллагааны хараат бус байдал, зохион байгуулалттай холбоотой асуудлаар санал хүргүүлж, шийдвэрлүүлэх;

Та манай харилцагч тал болох Улсын Их Хуралтай холбоотой дэлгэрэнгүй мэдээллийг дараах холбоосоос авах боломжтой. www.parliament.mn