Үндэсний аудитын газар нь Төсвийн тухай хуулийн 8 дугаар зүйлийн 8.9.1, 8.9.8 дахь заалт, Төрийн аудитын тухай хуулийн 8 дугаар зүйлийн 8.4, 8.7 дахь хэсэгт заасныг тус тус үндэслэн “Шалгагдагч байгууллагын 2025 оны 12 дугаар сарын 31-ний өдрөөр дуусвар болсон санхүүгийн тайлан, төсвийн гүйцэтгэлд аудит хийх аудитын хуулийн этгээдийг сонгон шалгаруулах” үйл ажиллагааг хэрэгжүүлж байгаа тул сонгон шалгаруулалтад оролцох хүсэлтэй аудитын үйлчилгээ үзүүлэх эрх бүхий хуулийн этгээдийг саналаа ирүүлэхийг урьж байна.

Аудитын хуулийн этгээд нь Монгол Улсын холбогдох хууль тогтоомжийг үйл ажиллагаандаа мөрдлөг болгон гэрээ, ажлын даалгаварт заасан ажлыг мэргэжлийн болон чанарын өндөр түвшинд хийж, шаардлагатай судалгаа, шинжилгээ, тооцоо, тайлан бусад ажлыг хугацаанд нь үнэн зөв, чанартай хэрэгжүүлэх үүрэг хүлээнэ.

Сонгон шалгаруулалтыг Монгол Улсын Ерөнхий аудиторын 2020 оны А/82 дугаар тушаалаар баталсан “Шинжээч сонгон шалгаруулах, гэрээ байгуулах, дүгнэх, гүйцэтгэсэн ажлын чанарыг хянах журам”-ын дагуу зохион байгуулна. Журмыг ЭНДЭЭС үзнэ үү.

Энэхүү сонгон шалгаруулах үйл ажиллагаа нь Төрийн аудитын байгууллагатай гэрээний үндсэн дээр хамтран ажиллах нийт 22 багцад хамаарна.

Аудитыг гүйцэтгэх хуулийн этгээд нь дараах шаардлагыг хангасан байна. Yүнд:

• Гүйцэтгэгч нь аудитын үйлчилгээ үзүүлэх тусгай зөвшөөрөлтэй байх; (Тухайн багцад хувьцаат компани багтсан бол санал ирүүлэх хуулийн этгээд нь Үнэт цаасны зах зээлд оролцогчид аудитын үйлчилгээ үзүүлэх тусгай зөвшөөрөлтэй байх шаардлагатайг анхаарна уу); 
• Аудиторууд нь мэргэжлийн ёс зүйн зөрчилгүй байх;
• Үйл ажиллагаа явуулах боломжтой ажлын байр, техник хэрэгсэлтэй байх;
• Аудитын багийн гишүүд нь шалгагдагч этгээдийн аль нэг албан тушаалтантай садан төрөл, бусад байдлаар хамааралгүй байх;
• Аудит хийсэн 2-оос дээш жилийн туршлагатай байх, өмнөх жилүүдэд гүйцэтгэсэн ажил нь хангалттай үнэлэгдсэн байх;

Аудитын багийн ажиллах хүчний шаардлага:

• Дөрвөөс доошгүй үндсэн орон тооны, хугацаагүй эрхтэй мэргэшсэн нягтлан бодогчтой байх;
• Хууль, эрх зүйн асуудал хариуцсан албан тушаалтантай байх /Нийгмийн даатгалын тодорхойлолт, гэрээ зэрэг бусад баримтуудаар нотлох/;
• Аудитын байгууллагад ажилладаг мэргэшсэн нягтлан бодогч өөр байгууллагад давхар ажил эрхэлдэггүй, бусад аудитын хуулийн этгээдэд гэрээгээр ажилладаггүй байх;

Сонгон шалгаруулалтын дэлгэрэнгүй жагсаалтад материалаа ирүүлэх аудитын хуулийн этгээд дээр тавигдсан шаардлагыг хангасан байх ба дараах материалыг бүрдүүлэн ирүүлэх шаардлагатай. Үүнд:

1. Албан хүсэлт (багцыг тодорхойлсон байх);
2. Улсын бүртгэлийн гэрчилгээний хуулбар;
3. Тусгай зөвшөөрлийн гэрчилгээний хуулбар;
4. Татварын тодорхойлолт /цахим сайтаас гаргасан QR кодтой, Татварын ерөнхий газрын даргын 2019 оны 8 дугаар сарын 30-ны өдрийн А/146 дугаар тушаалын 6 дугаар хавсралт дагуу гаргаж ирүүлэх/;
5. Нийгмийн даатгалын тодорхойлолт /цахим сайтаас гаргасан QR кодтой, Засгийн газрын 2023 оны 3 дугаар сарын 15-ны өдрийн 100 дугаар тогтоолын 3 дугаар хавсралтын дагуу гаргаж ирүүлэх/;
6. ШШГЕГ-ын хугацаа хэтэрсэн өр төлбөргүй талаарх тодорхойлолт;
7. Шүүхийн төрөлжсөн архивын тодорхойлолт;
8. Монголын мэргэшсэн нягтлан бодогчдын институтээс авсан мэргэжлийн ёс зүйн зөрчилгүй тухай тодорхойлолт;
9. Гүйцэтгэсэн адил төстэй үйлчилгээний сүүлийн 3 жилийн мэдээлэл;
10. Үндсэн ажилтны анкет, боловсрол, мэргэшлийн гэрчилгээний хуулбар;
11. Үндсэн ажилтны нийгмийн даатгалын цахим лавлагаа /сүүлийн 1 жилээр/                                                                                                                                                                                                                                                                                                                               /Хуулиар зөвшөөрөгдсөн давхар ажил эрхэлдэг бол түүнийг нотлох тодорхойлолтыг хавсаргах/

12. Санхүүгийн тайлан /2023, 2024 он/.

Сонирхсон этгээд нь мэдээллээ боловсруулж 2025 оны 09 дүгээр сарын 16-ны өдрийн 17 цаг 30 минутаас өмнө /munkhtuyats@audit.gov.mn/ цахим хаягаар ирүүлнэ үү. Саналыг цахим pdf файлаар нэгтгэн /PDF файлыг 15MB-аас ихгүй ирүүлэх ба файл заасан хэмжээнээс илүү гарсан бол файлыг хуваах/ ирүүлнэ. 

Ерөнхий шаардлагыг хангаж буй эсэхийг үнэлсний дараагаар “Хураангуй жагсаалт”-д бүртгэгдсэн этгээдэд “Саналын баримт бичиг”-ийг хүргүүлэх болно.

Хаяг:

Улаанбаатар хот, Чингэлтэй дүүрэг, Бага тойруу-3 Засгийн газрын IV байр 308 тоот,

Хууль, эрх зүй ил тод байдал хариуцсан албаны Ахлах шинжээч Ц.Мөнхтуяа

Холбоо барих: 

+976-51-261745, 92113939