Төсвийн тухай хуулийн 8 дугаар зүйлийн 8.9.1, Төрийн аудитын тухай хуулийн 8 дугаар зүйлийн 8.4, 8.7 дахь хэсэгт заасныг тус тус үндэслэн “Төсөл хэрэгжүүлэгч нэгжийн 2025 оны 12 дугаар сарын 31-ний өдрөөр дуусвар болсон санхүүгийн тайланд гэрээгээр аудит хийх аудитын хуулийн этгээдийг сонгон шалгаруулах” үйл ажиллагааг хэрэгжүүлж байгаа тул сонгон шалгаруулалтад оролцох хүсэлтэй аудитын үйлчилгээ үзүүлэх эрх бүхий хуулийн этгээдийг саналаа ирүүлэхийг урьж байна.

Аудитын хуулийн этгээд нь Монгол Улсын холбогдох хууль тогтоомжийг үйл ажиллагаандаа мөрдлөг болгон гэрээ, ажлын даалгаварт заасан ажлыг мэргэжлийн болон чанарын өндөр түвшинд хийж, шаардлагатай судалгаа, шинжилгээ, тооцоо, тайлан бусад ажлыг хугацаанд нь үнэн зөв, чанартай хэрэгжүүлэх үүрэг хүлээнэ.

Сонгон шалгаруулалтыг Монгол Улсын Ерөнхий аудиторын 2020 оны А/82 дугаар тушаалаар баталсан “Шинжээч сонгон шалгаруулах, гэрээ байгуулах, дүгнэх, гүйцэтгэсэн ажлын чанарыг хянах журам”-ын дагуу зохион байгуулна. Журмыг ЭНДЭЭС үзнэ үү.

Энэхүү сонгон шалгаруулах үйл ажиллагаа нь Төрийн аудитын байгууллагатай гэрээний үндсэн дээр хамтран ажиллах нийт 4 багцад хамаарна. Сонгон шалгаруулалтын багцын жагсаалтыг ЭНДЭЭС үзнэ үү.

Ажлын даалгавар:

Сонгон шалгаруулалтад оролцож буй аудитын хуулийн этгээд нь Үндэсний аудитын газар болон Монгол Улс дахь Дэлхийн банкнаас ирүүлсэн ажлын даалгаварт тавигдсан шаардлагыг хангасан байна.

Төсвийн шууд захирагчийн 2025 оны санхүүгийн тайлан, төсвийн гүйцэтгэлд хийх аудитын ажлын даалгавар болон Монгол Улс дахь Дэлхийн банкны санхүүжилтээр хэрэгжиж буй төслүүдийн 2025 оны санхүүгийн тайланд аудит хийх ажлын даалгаврыг тус тус ЭНДЭЭС үзнэ үү.

Аудитыг гүйцэтгэгч нь дараах шаардлагыг хангасан байна.

Yүнд:

• Гүйцэтгэгч нь аудитын үйлчилгээ үзүүлэх тусгай зөвшөөрөлтэй байх;
• Аудиторууд нь мэргэжлийн ёс зүйн зөрчилгүй байх;
• Үйл ажиллагаа явуулах боломжтой ажлын байр, техник хэрэгсэлтэй байх (Үл хөдлөх хөрөнгө, техник хэрэгслийн зураг, үл хөдлөх хөрөнгийн гэрчилгээ, түрээсийн гэрээ зэрэг холбогдох баримтуудаар нотлох);
• Аудитын багийн гишүүд нь шалгагдагч этгээдийн аль нэг албан тушаалтантай садан төрөл, бусад байдлаар хамааралгүй байх;
• Аудит хийсэн 2-оос дээш жилийн туршлагатай байх;

Ажиллах хүчний шаардлага:

• Дөрвөөс доошгүй үндсэн орон тооны, хугацаагүй эрхтэй мэргэшсэн нягтлан бодогчтой байх (Ижил төрлийн үйлчилгээ үзүүлсэн зохих ур чадвартай);
• Хууль, эрх зүйн асуудал хариуцсан албан тушаалтантай байх (Нийгмийн даатгалын тодорхойлолт, гэрээ зэрэг бусад баримтуудаар нотлох);
• Аудитын байгууллагад ажилладаг мэргэшсэн нягтлан бодогч өөр байгууллагад давхар ажил эрхэлдэггүй, бусад аудитын хуулийн этгээдэд гэрээгээр ажилладаггүй байх;
• Аудитын хуулийн этгээдийн захирал болон чанарын хяналтын менежер нь Аудитаар баталгаажуулсан санхүүгийн тайланг Монгол Улс дахь Дэлхийн банкны шаардлагад нийцсэн аудитын тайлан бэлтгэх англи хэлний ахисан түвшиний мэдлэгтэй байх (Багц 1, Багц 2-т хамаарна);
• 
  

Сонгон шалгаруулалтын дэлгэрэнгүй жагсаалтад материалаа ирүүлэх аудитын хуулийн этгээд дээр тавигдсан шаардлагыг хангасан байх ба дараах материалыг бүрдүүлэн ирүүлэх шаардлагатай.

Үүнд:

1. Албан хүсэлт (багцыг тодорхойлсон байх);
2. Улсын бүртгэлийн гэрчилгээний хуулбар;
3. Тусгай зөвшөөрлийн гэрчилгээний хуулбар;
4. Татварын тодорхойлолт /өр төлбөргүй байх, цахим сайтаас гаргасан QR кодтой/-ыг Татварын ерөнхий газрын даргын 2019 оны 8 дугаар сарын 30-ны өдрийн А/146 дугаар тушаалын 6 дугаар хавсралтаар гаргаж ирүүлэх;
5. Нийгмийн даатгалын тодорхойлолт /өр төлбөргүй байх, цахим сайтаас гаргасан QR кодтой/-ыг Засгийн газрын 2023 оны 3 дугаар сарын 15-ны өдрийн 100 дугаар тогтоолын 3 дугаар хавсралтаар гаргаж ирүүлэх; /Хүсэлт ирүүлэх этгээд нь саналын материал хүлээж авах эцсийн өдрийн байдлаар татвар болон нийгмийн даатгалын өргүй байхад анхаарах/
6. ШШГЕГ-ын хугацаа хэтэрсэн өр төлбөргүй талаарх тодорхойлолт;
7. Шүүхийн төрөлжсөн архивын тодорхойлолт;
8. Монголын мэргэшсэн нягтлан бодогчдын институтээс авсан мэргэжлийн ёс зүйн зөрчилгүй тухай тодорхойлолт;
9. Гүйцэтгэсэн адил төстэй үйлчилгээний сүүлийн 3 жилийн мэдээлэл /2023, 2024, 2025 он/;
10. Үндсэн ажилтны анкет, боловсрол, мэргэшлийн гэрчилгээний хуулбар;
11. Монгол Улс дахь Дэлхийн банкны шаардлагад нийцсэн аудитын тайлан бэлтгэх англи хэлний мэдлэгтэйг нотлох баримт;
12. Үндсэн ажилтны нийгмийн даатгалын цахим лавлагаа сүүлийн 1 жилээр /Хуулиар зөвшөөрөгдсөн давхар ажил эрхэлдэг бол түүнийг нотлох тодорхойлолтыг хавсаргах/
13. Санхүүгийн тайлан болон хуулийн дагуу санхүүгийн тайланд аудит хийлгэх үүрэгтэй оролцогч нь санхүүгийн тайланд хийсэн аудитын дүгнэлт /2023, 2024 он/

Сонирхсон этгээд нь мэдээллээ боловсруулж 2025 оны 09 дүгээр сарын 24-ний өдрийн 17 цаг 30 минутаас өмнө /Orkhonb@audit.gov.mn/ хаягаар ирүүлнэ үү. Саналыг цахим pdf файлаар нэгтгэн /PDF файлыг 15MB-аас ихгүй ирүүлэх ба файл заасан хэмжээнээс илүү гарсан бол файлыг хуваах/ ирүүлнэ.

Ерөнхий шаардлагыг хангаж буй эсэхийг үнэлсний дараагаар “Хураангуй жагсаалт”-д бүртгэгдсэн этгээдэд “Саналын баримт бичиг”-ийг хүргүүлэх болно.

Хаяг: Улаанбаатар хот, Чингэлтэй дүүрэг, Бага тойруу-3 Засгийн газрын IV байр 308 тоот Тамгын газрын шинжээч В.Орхон

Холбоо барих: +976-51-261745, 99106486