Иргэн та Төрийн аудитын байгууллагын цахим хуудас audit.mn рүү нэвтрэн орж, “Аудитын тайлан” гэсэн хуудсыг сонгож дарна. Системд амжилттай нэвтэрсний дараа дэлгэцийн зүүн талын “Хайх” хэсгээс аудитын тайланг түлхүүр үгээр шууд хайх боломжтой. Хэрэв түлхүүр үгээр олон илэрц зэрэг харагдвал Төрийн аудитын байгууллага хэсгээс холбогдох аудитын газрын нэр, гүйцэтгэсэн он, тайлангийн төрөл, төсөв захирагчийн ангиллаар болон санхүүгийн тайланд өгсөн аудитын дүгнэлтийн төрлийг сонгож хайснаар илүү нарийвчилсан үр дүн илрэх болно. Хайлтын үр дүнд санхүүгийн аудитын тайланг татан авч эсвэл өөрийн нэвтэрсэн төхөөрөмжийн дэлгэц дээр гүйлгэн харж, аудитын дүгнэлт, илэрсэн зөрчлийн талаарх мэдээллийг авах бүрэн боломжтой. Төрийн аудитын байгууллага жил бүр төсвийн байгууллага, төсөв захирагчийн, төрийн болон орон нутгийн өмчит, тэдгээрийн оролцоотой хуулийн этгээд зэрэг нийт 7000 орчим санхүүгийн тайланд аудит гүйцэтгэж, дүгнэлт өгсөн аудитын тайланг audit.mn сайтад нээлттэй байршуулж иргэд, олон нийт, иргэний нийгмийн байгууллагууд, харилцагч талуудтайгаа хамтран төрийн санхүүгийн удирдлагыг сайжруулахаар ажиллаж байна. Аудитын шийдвэрийн хэрэгжилтийг хангуулахад хамтарч ажилласан иргэн танд баярлалаа.
