НҮБ-ын Хөгжлийн Хөтөлбөрийн хүрээнд Төрийн аудитын байгууллагад жендэрийн эрх тэгш байдлын гэрчилгээжүүлэлтийн суурь үнэлгээ хийх, байгууллагын чадавх болон хариуцлагыг бэхжүүлэх чиглэлээр жендэрийн үйл ажиллагааны төлөвлөгөө боловсруулах ажлыг хэрэгжүүлж байна. Өнөөдөр (2026.09.24) “Төрийн аудитын байгууллага – Жендэрийн эрх тэгш байдал” сургалт, хэлэлцүүлгийг амжилттай зохион байгууллаа.

Сургалт, хэлэлцүүлэгт Үндэсний аудитын газрын аудитыг дэмжих чиг үүрэг бүхий бүтцийн нэгжүүдийн удирдлага, албан хаагчид оролцсон юм.  Энэ үеэр Төрийн аудитын байгууллагын жендэрийн эрх тэгш байдлын гэрчилгээжүүлэлтийн урьдчилсан үнэлгээний үр дүн, нийт албан хаагчдаас авсан жендэрийн асуудлаарх судалгааны үр дүн, мөн Жендэрийн үйл ажиллагааны төлөвлөгөөний төслийг тус тус танилцуулсан. Түүнчлэн жендэрийн үйл ажиллагааны төлөвлөгөөг хэрэгжүүлэхэд газар, нэгжүүдийн хамтын ажиллагаа, оролцоог хангах асуудлыг хэлэлцэж, энэхүү асуудлыг байгууллагын бодлого, төлөвлөлт, үйл ажиллагаанд хэрхэн тусгах талаар санал солилцов.

Сургалтаар мөн жендэрийн хариуцлагатай аудитыг онцлов. Тухайлбал, жендэрийн хариуцлагатай аудитын ойлголт, ач холбогдол, жендэрийн асуудлыг нийцлийн болон гүйцэтгэлийн аудитад тусгах боломж, олон улсын туршлага, практик жишээнүүдийг танилцуулж, хэлэлцсэн юм. Мөн жендэрийн үйл ажиллагааны төлөвлөгөөний төсөлд туссан арга хэмжээнүүдийг хэрэгжүүлэхэд албан хаагч нэг бүрийн оролцоог чухалчиллаа. Энэ үеэр Үндэсний аудитын газрын Тамгын дарга, Тэргүүлэх аудитор Б.Бундхорол  “Өнөөдрийн сургалт, хэлэлцүүлгээр ярилцаж, санал солилцсон асуудлууд маань Төрийн аудитын байгууллагын бодлого, төлөвлөлт, үйл ажиллагааны хэрэгжилтэд тусгалаа олох чухал эхлэл болж байна” гэдгийг тодотгосон юм.