Аудитын дээд байгууллагуудын Олон улсын байгууллага (ИНТОСАИ)-н Хөгжлийн санаачилга (Аи Ди Аи) болон Азийн Хөгжлийн банкнаас 2024 оны 12 дугаар сарын 2-3-ны өдрүүдэд Филиппин Улсын Манила хотноо зохион байгуулсан Парламентын гишүүд болон Аудитын дээд байгууллагуудын тэргүүнүүдэд зориулсан “Ард иргэдэд үнэ цэнийг бий болгоход Парламент болон Аудитын Дээд Байгууллагуудын хамтын ажиллагааны талаарх дээд түвшний хэлэлцүүлэг” сэдэвт уулзалтад Монгол Улсын Их Хурал болон Төрийн аудитын байгууллагын төлөөлөгчид оролцлоо.
Тус хэлэлцүүлэг-уулзалт нь Аудитын дээд байгууллагаас гүйцэтгэсэн аудитын үр нөлөөг дээшлүүлж, ард иргэдэд үнэ цэнийг авчрах чиглэлээр Парламент болон Төрийн аудитын байгууллага хэрхэн хамтын ажиллагаагаа сайжруулах талаар оролцогч орнуудын төлөөлөл шилдэг туршлага, саналаа солилцож, цаашид энэ чиглэлээр авч хэрэгжүүлэх арга хэмжээнүүдийг тодорхойлох зорилготой юм.
