Монгол Улсын Ерөнхий Аудитор С.Магнайсүрэн Азийн Хөгжлийн Банкны Санхүүгийн удирдлагын хэлтсийн Монгол Улсыг хариуцсан холбогч Кашиф Жамалыг хүлээн авч уулзлаа.
Уулзалтын үеэр Ерөнхий аудитор С.Магнайсүрэн тус банк нь манай улсын олон салбарт үр өгөөжтэй төслүүд хэрэгжүүлж буйд талархал илэрхийллээ. Улмаар төслүүдийн хэрэгжилтэд хийж буй санхүүгийн тайлангийн аудит болон төслийн үр дүн, дараагийн арга хэмжээнүүдийн талаарх саналаа танилцууллаа.
Азийн Хөгжлийн Банкны Санхүүгийн удирдлагын хэлтсийн Монгол Улсыг хариуцсан холбогч Кашиф Жамал хоёр байгууллагын хамтын ажиллагаанд сэтгэл хангалуун байдгаа илэрхийлээд, тус банкнаас хэрэгжүүлж буй төсөл хөтөлбөрүүдийн хэрэгжилтэд санхүүгийн аудит хийн, холбогдох дүгнэлт зөвлөмж ирүүлж буйд талархлаа. Цаашид дээрх чиглэлд илүү үр дүнтэй хамтран ажиллах, аудитын үр нөлөө болон чанарын хяналтыг сайжруулах, дараа жилийн аудит хийх Үнэлгээний хороог байгуулж сонгон шалгаруулалтыг зохион байгуулах саналаа илэрхийлэв.
Мөн ҮАГ-ын албан хаагчдын чадавхыг дээшлүүлэх, аудит хийх гарын авлага боловсруулах, Мэдээлэл технологийн төвийг хөгжүүлэхэд дэмжлэг үзүүлэх боломж байгааг дурдлаа.
Уулзалтад ҮАГ-ын Тамгын газрын дарга, Тэргүүлэх аудитор Б.Бундхорол, Санхүү нийцлийн аудитын газрын захирал, Тэргүүлэх аудитор Ц.Наранчимэг, Мэдээлэл технологийн төвийн захирал, Тэргүүлэх аудитор Б.Сэр-Од нар байлцлаа.
