Төрийн аудитын байгууллагын аудит хийх чиг үүрэг бүхий албан хаагчдад зориулсан сургалт, хэлэлцүүлгийг өнөөдөр (2026.09.25) зохион байгууллаа. Сургалт, хэлэлцүүлгээр Төрийн аудитын байгууллагаас 2026-2027 онд гүйцэтгэх аудитын явцад баримтлах бодлого, чиглэл, анхаарах асуудлыг танилцуулж, аудитын ажлын чанар, үр нөлөөг дээшлүүлэхэд чиглэсэн мэдээлэл, зөвлөмж өглөө. Энэ хүрээнд аудитын шийдвэрийн хэрэгжилт, үр нөлөөнд анхаарч ажиллах асуудал, аудитын түвшинд хийсэн чанарын баталгаажуулалтын үр дүн, цаашид анхаарах асуудлын талаар мэдээлэл өглөө. 
Мөн санхүүгийн тайлангийн аудит хийх чиг үүрэг бүхий албан хаагчдад аудитын явцад баримтлах бодлого, чиглэл, анхаарах асуудал, аудитын ажлын үр дүн болон цаашид хэрэгжүүлэх арга хэмжээний талаар нэгдсэн мэдээлэл өгч, санал солилцлоо. Сургалтад мөн Авлигатай тэмцэх газрын Урьдчилан сэргийлэх, соён гэгээрүүлэх хэлтсийн комиссар А.Цэнд-Аюуш төрийн аудитын үйл ажиллагаанд авлига, ашиг сонирхлын зөрчлөөс ангид, мэргэжлийн ёс зүйтэй ажиллах талаар мэдээлэл өгсөн юм. Тухайлбал, аудитын явцад олж мэдсэн албаны мэдээллийг ашиглах, шийдвэр гаргахад нөлөөлөх, албан тушаалаас чөлөөлөгдсөний дараах хязгаарлалт зэрэг төрийн албан тушаалтанд тавигдах хориглолт, хязгаарлалт болон ашиг сонирхлын зөрчлөөс урьдчилан сэргийлэхэд анхаарах асуудлыг танилцуулсан юм. Сургалт, хэлэлцүүлэгт Төрийн аудитын байгууллагын зохион байгуулалтын бүтцийн нэгжийн удирдлага, аудитын менежер, ахлах аудитор, аудитор зэрэг нийт 440 албан хаагч танхим болон цахим хэлбэрээр оролцлоо. Сургалтыг Монгол Улсын Ерөнхий аудиторын орлогч З.Цэдэнжав удирдан явуулсан бөгөөд оролцогчид 2026-2027 онд хэрэгжүүлэх аудитын ажлын бодлого, чиглэл, анхаарах асуудлаар нэгдсэн ойлголт, мэдээлэлтэй боллоо.
