Үндэсний аудитын газраас 2026 онд “Төсвийн хөрөнгөөр баригдаж буй барилга, байгууламжийн зураг төслийн төлөвлөлт, гүйцэтгэлийн үр дүн”-д гүйцэтгэлийн аудит хийх тул тус сэдвийн хүрээнд иргэд, олон нийтэд тулгамдсан, шийдвэрлэх шаардлагатай асуудлын талаар санал авч байна. Аудитад Барилгын хөгжлийн төв, Эрчим хүчний хөгжлийн төв, Зам тээврийн хөгжлийн төв зэрэг эрх бүхий байгууллагуудаас баталсан барилга байгууламжийн норм, дүрэм болон стандартын өнөөгийн байдлыг хамруулан авч үзнэ.
Тодруулбал эрх бүхий байгууллагын баталсан норм, стандартууд барилга байгууламжийн зураг төсөл, төлөвлөлтөд бодитоор хэрхэн мөрдөгдөж буйд үнэлэлт, дүгнэлт өгөх юм. Мөн цаашид хэрэгцээ шаардлагад үндэслэн шинээр батлах, шинэчлэн сайжруулах шаардлагатай норм, дүрмүүдийг тодорхойлохыг зорьж байгаа бөгөөд бодлогын түвшинд авч хэрэгжүүлэх арга хэмжээний саналыг боловсруулах юм.
Иймд иргэд, олон нийт Та бүхэн барилга, байгууламжийн зураг төслийн төлөвлөлт, гүйцэтгэлийн үр дүнтэй холбоотой санал, хүсэлтээ ononn@audit.gov.mn хаягаар ирүүлж, төрийн аудитын үйл явцад идэвхтэй хамтран ажиллана уу. Ирүүлсэн санал, хүсэлт, мэдээллийн эх сурвалжийн нууцлалыг чанд хадгалж, холбогдох хууль, журмын хүрээнд зөвхөн гүйцэтгэлийн аудитад ашиглах болно.
