Төрийн аудитын байгууллагын удирдах албан хаагчдын 2026 оны зөвлөгөөн өнөөдөр эхэллээ. Тус зөвлөгөөн нь байгууллагын 2025 оны гүйцэтгэлийн төлөвлөгөөний хэрэгжилтийг дүгнэх, 2026 оны үйл ажиллагааны стратеги, бодлого, төлөвлөлтийг хэрэгжүүлэх арга хэмжээний талаар удирдах албан хаагчдыг нэгдсэн арга зүйгээр хангах зорилготой юм.
Зөвлөгөөнийг нээж Монгол Улсын Ерөнхий аудитор С.Магнайсүрэн Төрийн аудитын байгууллагын бодлого, үйл ажиллагаа, цаашдын зорилт, чиглэлийн талаар мэдээлэл өглөө. Тэрбээр 2026 оныг “Аудитын нөлөөллийг тооцох, үнэлэх тогтолцоог төлөвшүүлэх жил” болгон зарласныг онцолж, зорилтыг хангах арга хэмжээг үр дүнтэй хэрэгжүүлэхийг үүрэг болголоо. Мөн 2026 оны үйл ажиллагааны бодлого, төлөвлөлтийг тодорхойлохдоо аудитын шийдвэрийн хэрэгжилтийг хангах, үр нөлөөг нэмэгдүүлэхэд чиглэсэн хууль эрх зүйн орчныг боловсронгуй болгох саналуудыг судлан боловсруулж, УИХ-ын Төсвийн байнгын хороонд танилцуулахаар бэлтгэж байгааг дурдлаа. Эдгээр өөрчлөлтөөр аудитын шийдвэрийг хугацаанд нь биелүүлэх, хэрэгжээгүй тохиолдолд албадан гүйцэтгэх эрх зүйн орчин бүрдэнэ гэж үзэж байна. Цаашид Төрийн аудитын байгууллагын ажлын амжилтыг аудитын тоогоор бус, шийдвэрийн хэрэгжилтээр бий болсон бодит нөлөөллөөр хэмжих шинэ чиг хандлагыг төлөвшүүлнэ гэдгийг онцоллоо. 
Зөвлөгөөнд Монгол Улсын Их Хурлын Төсвийн байнгын хорооны дарга Н.Наранбаатар оролцсон юм. Тэрбээр Төрийн аудитын байгууллагын удирдах албан хаагчдад хандан хэлэхдээ “Монгол Улсын Их Хурлын 2024–2028 оны стратеги төлөвлөгөөнд хууль тогтоомжийн биелэлтэд УИХ-ын хянан шалгах чиг үүргийг хэрэгжүүлэх тогтолцоог бэхжүүлэх зорилтыг дэвшүүлсэн. Уг зорилтыг хангахад Төрийн аудитын байгууллагын үүрэг, оролцоо нэн чухал” хэмээн онцлов. Түүнчлэн Төсвийн байнгын хороо 2026 оны аудитын сэдвийг төр, олон нийтийн анхаарлын төвд байгаа асуудлуудад чиглүүлэн баталсан бөгөөд эдгээрт бодитой, чанартай аудит хийх шаардлагатайг дурдав.
Зөвлөгөөний хүрээнд “Төрийн аудитын байгууллагын 2025–2030 оны стратеги төлөвлөгөө, харилцагч талуудын бодлого, инновац, цахим шилжилт”, “Аудитын нөлөөллийг үнэлэх, тооцох арга зүй” сэдвээр илтгэл тавьж, аудитын газруудын үйл ажиллагаанд анхаарах асуудал, аудитын шийдвэрийн хэрэгжилтийн хууль, эрх зүйн орчин, Төрийн аудитын байгууллагын цахим шилжилтийн үйл ажиллагааны талаар мэдээлэл хийв.
