Төрийн аудитын байгууллага 2025 оны үйл ажиллагааны үр дүнгээр шилдгүүдээ шалгаруулсан бөгөөд өнөөдөр Монгол Улсын Ерөнхий аудитор С.Магнайсүрэн батламжийг нь гардуулан өглөө.
Тэрбээр төрийн санхүү, төсвийн хяналтыг хараат бусаар хэрэгжүүлэх чиг үүргээ өндөр хариуцлага, мэргэжлийн ур чадвараар амжилттай хэрэгжүүлж, хамт олноо манлайлсан аудитын баг, албан хаагчдад талархал илэрхийлэв. Улмаар аудитын байгууллагын нэр хүнд, үйл хэргийг бэхжүүлэхэд албан хаагч бүрийн хариуцлага, ёс зүй, мэргэжлийн ур чадвар чухал үүрэгтэйг онцолсон юм.
2025 оны шилдэг аудитын багаар Санхүүгийн аудитын газрын Аудитын менежер Д.Энхдалайгаар удирдуулсан аудитын баг шалгарлаа. Мөн “Уул уурхайн нөхөн сэргээлтийн сангийн үйл ажиллагаа, үр дүн, үр нөлөө”-д хийсэн гүйцэтгэлийн аудитыг “Шилдэг аудитын тайлан”-аар шалгарсан бөгөөд тус аудитыг гүйцэтгэсэн Аудитын менежер Б.Сандуйжаваар удирдуулсан багт баяр хүргэж, цаашдын ажилд нь амжилт хүслээ. Аймаг, нийслэл дэх Төрийн аудитын газруудаас Дорноговь аймаг дахь Төрийн аудитын газрын гүйцэтгэсэн “Хөдөлмөр эрхлэлтийг дэмжих сангийн үйл ажиллагааны үр дүн” сэдэвт аудит 2025 оны шилдэг аудитын тайлангаар тодорсон. Түүнчлэн Үндэсний аудитын газрын зохион байгуулалтын бүтцийн нэгжүүдээс шилдэг албан хаагчдыг шалгаруулж, батламжийг нь гардууллаа. 
Монгол Улсын Ерөнхий аудитор С.Магнайсүрэн шилдгээр тодорсон албан хаагчид, баг хамт олонд хандан “Ажил үйлсээрээ тэргүүлж, хамт олноо манлайлан ажилласан та бүхэндээ дахин талархал илэрхийлье. “Шилдэг” гэсэн эрхэм тодотголоо өргөж, улам их амжилт бүтээхийг хүсэн ерөөе” гэсэн юм.
