Ерөнхий аудитор С.Магнайсүрэн НҮБ-ын Хүүхдийн Сан (UNICEF)-ийн Монгол дахь Суурин төлөөлөгч, хатагтай Биате Дастелийг өнөөдөр (2026.03.19) хүлээн авч уулзлаа. Хатагтай Биате Дастел нь энэ оны хоёрдугаар сард тус байгууллагын Монгол дахь Суурин төлөөлөгчөөр томилогдсон бөгөөд уулзалтаар НҮБ-ын Хүүхдийн Сан болон Үндэсний аудитын газар хоорондын хамтын ажиллагааг бэхжүүлэх, хүүхдийн эрх, хамгааллын чиглэлд цаашид хамтран хэрэгжүүлэх тэргүүлэх зорилт, чиглэлүүдийн талаар санал солилцов. 2024 онд Төрийн аудитын байгууллагын бодлогоор гүйцэтгэх аудитын хүрээнд “Хүүхэд хамгааллын талаар төрөөс баримталж буй бодлого, түүний хэрэгжилт, үр дүн”-д гүйцэтгэлийн аудитыг хийсэн. Уг аудитын үйл ажиллагаанд НҮБ-ын Хүүхдийн Сангаас дэмжлэг үзүүлж ажилласан юм. 
Тус аудитаар 2019-2023 оны хооронд хэрэгжсэн хүүхэд хамгааллын бодлого, төлөвлөлтийн тогтолцооны оновчтой байдал, бодлогын хэрэгжилт, үр дүн, мөн хүүхэд хамгааллын үйлчилгээний төлөвлөлт, төсөвлөлтийн үр өгөөж, хүүхдэд ээлтэй байдлыг цогцоор нь үнэлсэн юм.
