Монгол Улсын Ерөнхий аудитор С.Магнайсүрэн улс төрийн намуудад төрөөс олгосон санхүүжилтэд аудит хийх асуудлаар Сонгуулийн ерөнхий хорооны удирдлагуудтай уулзалт хийлээ. Улсын дээд шүүхэд бүртгэлтэй 37 намаас 29 нам 2025 оны санхүүгийн тайлангаа Сонгуулийн ерөнхий хороонд ирүүлсэн байна. Эдгээрээс 2024 оны Улсын Их Хурлын сонгуулийн дүнгээр нийт сонгогчийн нэг ба түүнээс дээш хувийн санал авч төрөөс санхүүжилт авах шаардлага хангасан есөн намд дүгнэлт гаргуулахаар Сонгуулийн ерөнхий хороо Үндэсний аудитын газарт ирүүлсэн юм. Төрийн аудитын байгууллага төрөөс улс төрийн намд олгосон санхүүжилт, гүйцэтгэлд гаргасан дүгнэлтийг жил бүрийн төсвийн гүйцэтгэлийн тайланд тусган тайлагнахаар Улс төрийн намын тухай хуулийн 39 дүгээр зүйлийн 39.5 дахь хэсэгт заасан. Мөн Сонгуулийн ерөнхий хорооны төсвийн ерөнхийлөн захирагчийн төсвийн багцад туссан улс төрийн намд олгосон төрийн санхүүжилтэд аудит хийж дүгнэлт гаргана.
