Үндэсний аудитын газраас Монгол Улсын нэгдсэн төсвийн гүйцэтгэл болон Засгийн газрын 2025 оны санхүүгийн нэгтгэсэн тайланд хийх аудитыг эхлүүллээ. Аудитаар Монгол Улсын 2025 оны нэгдсэн төсвийн бодлого, зорилт үр нөлөөтэй хэрэгжсэн эсэх болон төсвийн гүйцэтгэлийг үнэн зөв илэрхийлсэн эсэхэд дүгнэлт гаргах юм.
Монгол Улсын нэгдсэн төсөв, улсын төсөв, орон нутгийн төсөв, нийгмийн даатгал болон эрүүл мэндийн даатгалын сангийн төсвийн гүйцэтгэлийн тайлан, улсын төсвийн 35, орон нутгийн төсвийн 22 ерөнхийлөн захирагчийн төсвийн гүйцэтгэлийн тайлан, улс төрийн намуудад олгосон төрийн санхүүжилт, түүний зарцуулалтын тайланг тус тус аудитад хамруулна. Аудитын нээлтийг Монгол Улсын Ерөнхий аудитор С.Магнайсүрэн хийж, аудитын зорилго, хамрах хүрээ, төлөвлөгөө болон аудитын явцад анхаарах асуудлуудын талаар мэдээлэл өглөө.
Нээлтэд Сангийн яамны Төрийн нарийн бичгийн даргын албан үүргийг түр орлон гүйцэтгэгч Б.Анар тэргүүтэй албаны төлөөлөл, Үндэсний аудитын газрын аудитын чиг үүрэг бүхий газрын захирал, тэргүүлэх аудиторууд оролцлоо.
