Монгол Улсын Ерөнхийлөгчийн санаачилсан “Тэрбум
мод” үндэсний хөдөлгөөний хүрээнд Үндэсний аудитын газрын хамт олон өнөөдөр
Хан-Уул дүүргийн 14 дүгээр хороо, Өлзийт хорооллын “Түргэний гол”-ын дагуу 100
ширхэг гацуурын суулгац тарилаа. “Байгальд өгсөн бүхэн буцаад ирдэг” уриан дор энэ
жил орон даяар өрнөж буй үндэсний хөдөлгөөнд байгууллага, хамт олон идэвхтэй
нэгдэж байгаа бөгөөд Үндэсний аудитын газрын албан хаагчид ч мөн байгаль орчноо
хамгаалах, ногоон байгууламжийг нэмэгдүүлэх үйлсэд хувь нэмрээ орууллаа. 
Тус арга хэмжээнд Монгол Улсын Ерөнхий аудитор
С.Магнайсүрэн, Үндэсний аудитын газрын удирдлагууд болон албан хаагчид оролцож,
тарьсан модоо арчлан ургуулахын ач холбогдлыг чухалчилсан юм. Үндэсний аудитын газар нь “Тэрбум мод” үндэсний
хөдөлгөөнд жил бүр тогтмол нэгдэн оролцож ирсэн бөгөөд өнөөдрийг хүртэл нийт
гурван байршилд олон зуун мод тарьж, ургуулан арчилж байна.
