Нэгдсэн Үндэстний Байгууллагын Хөгжлийн хөтөлбөрөөс “Монгол Улсын хууль сахиулах байгууллагад хүний эрх, жендэрийн тэгш байдал болон авлигын эсрэг үйл ажиллагааг дэмжих төсөл”-ийг үндэсний түнш байгууллагуудтай хамтран хэрэгжүүлж байна. Энэхүү төслийн хүрээнд Үндэсний аудитын газарт жендэрийн тэгш байдлын гэрчилгээжилтийн суурь үнэлгээ хийх, байгууллагын чадавх болон хариуцлагыг бэхжүүлэх зорилгоор жендэрийн үйл ажиллагааны төлөвлөгөө боловсруулахад техникийн дэмжлэг үзүүлж байгаа юм.
Өнөөдөр (2026.05.22) тус хөтөлбөрийг хэрэгжүүлэх урьдчилсан үнэлгээний танилцуулгын нээлт боллоо. Нээлтийн арга хэмжээнд Монгол Улсын Ерөнхий аудитор С.Магнайсүрэн, НҮБ-ын Суурин төлөөлөгчийн орлогч Лин Цао болон төслийн зөвлөхүүд оролцож, Үндэсний аудитын газрын албан хаагчдад жендэр, хүний эрх, жендэрийн тэгш байдлын гэрчилгээжилтийн хөтөлбөрийн талаар мэдээлэл, ойлголт өглөө. Мөн төрийн бусад байгууллагын сайн туршлагыг танилцуулж, Төрийн аудитын байгууллагад хэрэгжүүлэх урьдчилсан үнэлгээний үйл ажиллагаа болон түүний хүлээгдэж буй үр дүнгийн талаар мэдээлэл солилцов.
Монгол Улсын Ерөнхий аудитор С.Магнайсүрэн нээлтийн үеэр хэлсэн үгэндээ жендэрийн эрх тэгш байдлыг хангах нь зөвхөн нийгмийн асуудал бус, байгууллагын сайн засаглал, ил тод байдал, үр нөлөөтэй үйл ажиллагааны салшгүй хэсэг болохыг онцоллоо. Тэрбээр “...Энэхүү хөтөлбөрийг НҮБ-ын Хөгжлийн хөтөлбөр болон хамтрагч байгууллагуудтай хамтран хэрэгжүүлж байгаа нь бидний хувьд чадавх бэхжүүлэх, олон улсын сайн туршлагыг нэвтрүүлэх чухал боломж юм...” хэмээв.
НҮБ-ын Суурин төлөөлөгчийн орлогч Лин Цао Монгол Улсын төрийн сектор дахь институцийн төгөлдөршил, хариуцлага, тэгш хамрагдалтыг ахиулахад Үндэсний аудитын газар манлайлан ажиллаж байгааг тэмдэглэлээ. Тэрбээр төрийн дээд хяналтын байгууллагын оролцоо энэхүү хөтөлбөрийг хэрэгжүүлэхэд онцгой чухал болохыг дурдан, Үндэсний аудитын газар гэрчилгээжилтийн хөтөлбөрт нэгдсэнээр дэлхийн 30 гаруй орны төрийн байгууллагуудыг хамарсан, засаглалын тогтолцоог илүү хүртээмжтэй болгохоор зорин ажиллаж буй олон улсын хамтын нийгэмлэгийн нэг хэсэг болж байгааг онцолсон юм.
