"Улсын Их Хурлаас удирдлага нь томилогдож, ажлаа шууд хариуцан тайлагнадаг” байгууллагуудын ажилтан, албан хаагчдын бие бялдрыг хөгжүүлэх, чөлөөт цагийг зөв боловсон өнгөрүүлэх зорилгоор жил бүр уламжлал болгон зохион байгуулдаг шилжин явах цомын төлөөх спортын тэмцээн энэ сарын 15-наас 23-ны өдрүүдэд амжилттай зохион байгуулагдаж, дүнгээ гаргалаа. Энэ удаагийн тэмцээн Авлигатай тэмцэх газрын 20 жилийн ойн хүрээнд болж, тус байгууллага “Бидний цом-2026” уриан дор хариуцан зохион байгуулав.
Тэмцээн дартс, волейбол, сагсан бөмбөг, шатар, хөлбөмбөг, пауэрлифтинг гэсэн зургаан төрлөөр явагдсан бөгөөд Монгол Улсын Их Хурлын Тамгын газар, Үндэсний аудитын газар, Авлигатай тэмцэх газар, Монголбанк, Санхүүгийн зохицуулах хороо, Сонгуулийн ерөнхий хороо, Төрийн албаны зөвлөл, Үндэсний статистикийн хороо, Хүний эрхийн үндэсний комисс, Шүүхийн ерөнхий зөвлөл зэрэг нийт 10 байгууллагын 700 орчим тамирчин оролцож, хурд хүч, авхаалж самбаагаа сорин өрсөлдлөө.
Үндэсний аудитын газрын албан хаагчид тэмцээний төрөл бүрд амжилттай оролцов. Тухайлбал, волейболын төрөлд эрэгтэй, эмэгтэй багууд алтан медаль хүртэж, өмнөх жилийн амжилтаа бататгасан бол сагсан бөмбөгийн төрөлд эрэгтэй баг мөнгө, эмэгтэй баг хүрэл медаль хүртлээ. Мөн дартс болон пауэрлифтингийн төрөлд багаараа тус бүр IV байр эзэлсэн бөгөөд бусад төрлийн нийлбэр оноогоор Үндэсний аудитын газар “Бидний цом-2026” тэмцээний гуравдугаар байрт шалгарсан юм.
