БНХАУ-ын Ерөнхий аудиторын орлогч Жан Жүн тэргүүтэй төлөөлөгчид Монгол Улсын Төрийн аудитын байгууллагад ажлын айлчлал хийж байна. Өнөөдөр /2026.05.26/ Монгол Улсын Ерөнхий аудиторын орлогч З.Цэдэнжав төлөөлөгчдийг хүлээн авч уулзлаа. Монгол, Хятадын аудитын дээд байгууллагууд 2000 онд анх Харилцан ойлголцлын санамж бичиг байгуулснаас хойш хамтын ажиллагаагаа идэвхтэй хөгжүүлж ирсэн. Хамгийн сүүлд Монгол Улсын Ерөнхий аудитор С.Магнайсүрэн БНХАУ-д болсон Аудитын дээд байгууллагуудын олон улсын байгууллагын “Их өгөгдлийн ажлын хэсэг”-ийн чуулга уулзалтад оролцох үеэрээ БНХАУ-ын Ерөнхий аудитортай уулзан хоёр байгууллагын хамтын ажиллагааны “Харилцан ойлголцлын санамж бичиг”-ийг шинэчлэн байгуулсан юм. 
Уулзалтын үеэр Монгол Улсын Ерөнхий аудиторын орлогч З.Цэдэнжав хоёр байгууллагын хамтын ажиллагаанд талархал илэрхийлээд, БНХАУ-ын Нанжины аудитын их сургуулийн магистрын хөтөлбөрөөр дамжуулан Монгол Улсын Төрийн аудитын байгууллагын албан хаагчдыг магистрын түвшинд чадавхжуулж ирснийг онцлон тэмдэглэлээ. Түүнчлэн ноён Жан Жүн тэргүүтэй төлөөлөгчдийн айлчлалын хүрээнд хоёр талын хамтарсан сургалт, хэлэлцүүлэг зохион байгуулах бөгөөд хариуцлагатай засаглал, аудитын үйл ажиллагаанд их өгөгдөл, дэвшилтэт мэдээллийн технологи, хиймэл оюун ухаан ашиглах зэрэг сэдвийг онцолсон юм. Мөн аудитын шийдвэрийн хэрэгжилтийг хангах сайн туршлагыг хуваалцах сонирхолтой байгаагаа дурдлаа. 
БНХАУ-ын Үндэсний аудитын газрын орлогч Жан Жүн Монгол Улсын Төрийн аудитын байгууллагаас Нанжины аудитын их сургуульд суралцсан болон одоо суралцаж буй албан хаагчдын мэдлэг, ур чадварыг өндрөөр үнэлж байгаагаа илэрхийлээд, айлчлалын хүрээнд зохион байгуулах сургалт, хэлэлцүүлгээс өндөр үр дүн хүлээж буйгаа онцоллоо. БНХАУ-ын Үндэсний аудитын газар нь тус улсын Үндсэн хуулиар баталгаажсан хяналт шалгалтын төв байгууллага бөгөөд төрийн санхүү, төсөв, төрийн өмчит байгууллагуудын үйл ажиллагаанд аудит, хяналт хэрэгжүүлдэг. Тус байгууллага нь БНХАУ-ын Төрийн зөвлөлийн Ерөнхий сайдын шууд удирдлага дор үйл ажиллагаагаа явуулдаг байна. Түүнчлэн улсын төсвийн орлого, зарлага, үр ашигт аудит хийх, албан тушаалтны авлига, санхүүгийн зөрчлийг илрүүлэх, хөрөнгө, орлогын мэдүүлэг болон төрийн өмчийн ашиглалтад хяналт тавих зэрэг чиг үүргийг хэрэгжүүлэн ажилладаг аж.
