Бүгд Найрамдах Ардчилсан Лаос Ард Улсын Төрийн аудитын байгууллагын Ерөнхийлөгч Виенгтависоне Тепачан тэргүүтэй төлөөлөгчид Монгол Улсын Үндэсний аудитын газарт ажлын айлчлал хийж байна. Айлчлалын хүрээнд өнөөдөр (2026.06.08) Монгол Улсын Ерөнхий аудитор С.Магнайсүрэн төлөөлөгчдийг хүлээн авч уулзлаа. Уулзалтад БНАЛАУ-аас Монгол Улсад суугаа Онц бөгөөд Бүрэн эрхт Элчин сайд Хүнгээв Сүгсавид оролцов.
Монгол Улсын Ерөнхий аудитор С.Магнайсүрэн төлөөлөгчдийг манай оронд тавтай саатахыг уриад, айлчлалын хүрээнд зохион байгуулагдах сургалт, хэлэлцүүлэг нь хоёр улсын аудитын байгууллагуудын хамтын ажиллагааг бэхжүүлж, харилцан туршлага солилцоход чухал хувь нэмэр оруулна гэдэгт итгэлтэй байгаагаа илэрхийллээ. 
БНАЛАУ-ын Төрийн аудитын байгууллагын Ерөнхийлөгч Виенгтависоне Тепачан энэхүү айлчлалын үеэр уул уурхайн нөхөн сэргээлтийн сангийн ашиглалтад хийх аудит, аудитын шийдвэрийн хэрэгжилтэд тавих хяналт, мэдээллийн технологи болон хиймэл оюун ухааныг аудитад ашиглах чиглэлээр Монгол Улсын туршлагыг судлах зорилготой гэдгээ онцлов. Тэрбээр мөн Лаосын Төрийн аудитын байгууллага 1998 онд байгуулагдаж, 2012 оноос эрх зүйн үндэс нь бүрэн бүрдсэн талаар танилцуулсан юм. Түүнчлэн улсын төсвийн төсөлд санал, дүгнэлт өгөх шинэ чиг үүргээ хэрэгжүүлэхэд шаардлагатай арга зүй, туршлагыг Монгол Улсын Төрийн аудитын байгууллагаас суралцах сонирхолтой байгаагаа илэрхийллээ. 
Үүнээс гадна байгууллагын бүтэц, зохион байгуулалт, аудитын үр дүн болон шийдвэрийн хэрэгжилтийн талаар олон нийтэд мэдээлэл хүргэх, байгууллагын үйл ажиллагааны талаарх ойлголтыг нэмэгдүүлэх чиглэлээр сайн туршлагыг судлах хүсэлтэй гэлээ. Монгол Улсын Ерөнхий аудитор С.Магнайсүрэн айлчлалын хугацаанд хоёр тал харилцан туршлага солилцож, мэдээлэл, арга зүйгээ хуваалцах өргөн боломж бүрдэнэ гэдгийг онцолсон юм. Уулзалтад Үндэсний аудитын газрын удирдлагууд оролцов. 
